ஸ்ரீமத் பாம்பன் குமரகுருதாச சுவாமிகள் அருளியசண்முக கவசம்
Shanmuga Kavasam
"Padmashri" Dr. Sirkazhi S. Govindarajan
1 / 4
அண்டமாய் அவனியாகி அறியொணாப் பொருள(து) ஆகித்
தொண்டர்கள் குருவுமாகித் துகள் அறு தெய்வமாகி
எண்திசை போற்ற நின்ற என்அருள் ஈசன் ஆன
திண்திறல் சரவணத்தான் தினமும் என் சிரசைக் காக்க.
ஆதியாம் கயிலைச் செல்வன்அணிநெற்றி தன்னைக் காக்க
தாதவிழ் கடப்பந் தாரான் தானிரு நுதலைக் காக்க
சோதியாம் தணிகை ஈசன் துரிசுஇலா விழியைக் காக்க
நாதனாம் கார்த்தி கேயன் நாசியை நயந்து காக்க.
இருசெவிகளையும் செவ்வேள் இயல்புடன் காக்க, வாயை
முருகவேள் காக்க, நாப்பல் முழுதும்நல் குமரன் காக்க
துரிசறு கதுப்பை யானைத் துண்டனார் துணைவன் காக்க
திருவுடன் பிடரி தன்னைச் சிவசுப்ர மணியன் காக்க.
ஈசனாம் வாகுலேயன் எனது கந்தரத்தைக் காக்க
தேசுறு தோள் விலாவும் திருமகள் மருகன் காக்க
ஆசிலா மார்பை ஈராறு ஆயுதன் காக்க, என்றன்
ஏசிலா முழங்கை தன்னை எழில் குறிஞ்சிக்கோன் காக்க.
உறுதியாய் முன்கை தன்னை உமையிள மதலை காக்க
தறுகண் ஏறிடவே என்கைத் தலத்தை மாமுருகன் காக்க
புறம்கையை அயிலோன் காக்க, பொறிக்கர விரல்கள் பத்தும்
பிறங்கு மால்மருகன்காக்க, பின்முதுகைச் சேய் காக்க.
ஊண்நிறை வயிற்றை மஞ்ஞை ஊர்த்தியோன் காக்க, வம்புத்
தோள்நிமிர் சுரேசன் உந்திச் சுழியினைக் காக்க, குய்ய
நாணினை அங்கி கெளரிநந்தனன் காக்க, பீஜ
ஆணியை கந்தன்காக்க, அறுமுகன் குதத்தைக் காக்க.
எஞ்சிடாது இடுப்பை வேலுக்கு இறைவனார் காக்க காக்க
அம்சகனம் ஓர் இரண்டும் அரன்மகன் காக்க காக்க
விஞ்சிடு பொருள் காங்கேயன் விளரடித் தொடையைக் காக்க
செஞ்சரண நேச ஆசான் திமிரு முன் தொடையைக் காக்க.
ஏரகத் தேவன்என்தாள் இரு முழங்காலும் காக்க
சீருடைக் கணைக்கால் தன்னைச் சீரலைவாய்த்தே காக்க
நேருடைப் பரடு இரண்டும் நிகழ் பரங்கிரியன் காக்க
சீரிய குதிக்கால் தன்னைத் திருச்சோலை மலையன் காக்க.
ஐயுறு மலையன்பாதத்து அமர் பத்து விரலும் காக்க
பையுறு பழநி நாத பரன், அகம் காலைக் காக்க
மெய்யுடன் முழுதும், ஆதி விமல சண்முகவன் காக்க
தெய்வ நாயக விசாகன் தினமும் என் நெஞ்சைக் காக்க.
ஒலியெழ உரத்த சத்தத் தொடுவரு பூத ப்ரேதம்
பலிகொள் இராக்கதப்பேய் பலகணத்து எவை ஆனாலும்
கிலிகொள எனைவேல் காக்க, கெடுபரர் செய்யும் சூன்யம்
வலியுள மந்த்ர தந்த்ரம் வருத்திடாது அயில்வேல் காக்க.
ஓங்கிய சீற்றமே கொண்டு உவணிவில் வேல் சூலங்கள்
தாங்கிய தண்டம் எஃகம் தடி பரசு ஈட்டி யாதி
பாங்குடை ஆயுதங்கள் பகைவர் என் மேலே ஓச்சின்,
தீங்கு செய்யாமல் என்னைத் திருக்கைவேல் காக்க காக்க.
ஒளவியமுளர் ஊன் உண்போர் அசடர் பேய் அரக்கர் புல்லர்
தெவ்வர்கள் எவர் ஆனாலும் திடமுடன் எனைமற் கட்டத்
தவ்வியே வருவா ராயிற், சராசரம் எலாம் புரக்கும்
கவ்வுடைச் சூர சண்டன் கைஅயில் காக்க காக்க.
கடுவிடப் பாந்தள் சிங்கம் கரடி நாய் புலிமா யானை
கொடிய கோணாய் குரங்கு கோல மார்ச்சாலம் சம்பு
நடையுடை எதனா லேனும் நான் இடர்ப் பட்டி டாமல்
சடிதியில் வடிவேல் காக்க சானவிமுளை வேல் காக்க.
ஙகரமே போல் தழீஇ ஞானவேல் காக்க, வன்புள்
சிகரிதேள் நண்டுக் காலி செய்யன் ஏறு ஆலப் பல்லி
நகமுடை ஓந்தி பூரான் நளிவண்டு புலியின் பூச்சி
உகமிசை இவையால், எற் குஓர் ஊறுஇலாது ஐவேல் காக்க.
சலத்தில் உய்வன்மீன் ஏறு, தண்டுடைத் திருக்கை, மற்றும்
நிலத்திலும் சலத்திலும் தான் நெடுந்துயர் தரற்கே உள்ள
குலத்தினால், நான் வருத்தம் கொண்டிடாது அவ்வவ்வேளை
பலத்துடன் இருந்து காக்க, பாவகி கூர்வேல் காக்க.
ஞமலியம் பரியன்கைவேல், நவக்கிரகக்கோள் காக்க
சுமவிழி நோய்கள், தந்த சூலை, ஆக்கிராண ரோகம்,
திமிர்கழல் வாதம், சோகை, சிரமடி கர்ண ரோகம்
எமை அணுகாமலே பன்னிருபுயன் சயவேல் காக்க.
டமருகத்து அடிபோல் நைக்கும் தலையிடி, கண்ட மாலை
குமுறு விப்புருதி, குன்மம், குடல்வலி, ஈழை காசம்,
நிமிரொணா(து) இருத்தும்வெட்டை, நீர்பிரமேகம் எல்லாம்
எமை அடையாமலே குன்று எறிந்தவன் கைவேல் காக்க.
இணக்கம் இல்லாத பித்த எரிவு, மாசுரங்கள், கைகால்
முணக்கவே குறைக்கும் குஷ்டம், மூலவெண்முளை, தீமந்தம்
சணத்திலே கொல்லும் சன்னி சாலம் என்று அறையும் இந்த
பிணிக்குலம் எனை ஆளாமல் பெரும்சத்தி வடிவேல் காக்க.
தவனமா ரோகம், வாதம், சயித்தியம், அரோசகம், மெய்
சுவறவே செய்யும் மூலச்சூடு, இளைப்பு, உடற்று விக்கல்,
அவதிசெய் பேதி சீழ்நோய், அண்டவாதங்கள், சூலை
எவையும் என்னிடத்து எய்தாமல் எம்பிரான் திணிவேல் காக்க.
நமைப்புறு கிரந்தி, வீக்கம் நணுகிடு பாண்டு, சோபம்
அமர்த்திடு கருமை வெண்மை ஆகுபல் தொழுநோய் கக்கல்
இமைக்குமுன் உறு வலிப்போடு எழுபுடைப்பகந்த ராதி
இமைப்பொழுதேனும் என்னை எய்தாமல் அருள்வேல் காக்க.
பல்லது கடித்து மீசை படபடென்றே துடிக்கக்
கல்லினும் வலிய நெஞ்சம் காட்டியே உருட்டி நோக்கி
எல்லினும் கரிய மேனி எமபடர், வரினும் என்னை
ஒல்லையில் தார காரி ஓம் ஐம் ரீம் வேல் காக்க.
மண்ணிலும் மரத்தின்மீது மலையிலும் நெருப்பின் மீதும்
தண்ணிறை ஜலத்தின் மீதும்சாரி செய் ஊர்தி மீதும்
விண்ணிலும் பிலத்தின் உள்ளும் வேறு எந்த இடத்தும் என்னை
நண்ணிவந்து அருள் ஆர்சஷ்டி நாதன் வேல் காக்க காக்க.
யகரமேபோல் சூல் ஏந்தும் நறும்புயன் வேல்முன் காக்க
அகரமே முதலாம் ஈராறு அம்பகன் வேல்பின் காக்க
சகரமோடு ஆறும் ஆனோன் தன்கைவேல் நடுவில் காக்க
சிகரமின் தேவ மோலி திகழ் ஐவேல் கீழ்மேல் காக்க.
ரஞ்சித மொழி தேவானை நாயகன் வள்ளி பங்கன்
செஞ்சய வேல் கிழக்கில் திறமுடன் காக்க, அங்கி
விஞ்சிடு திசையில் ஞான வீரன் வேல் காக்க, தெற்கில்
எஞ்சிடாக் கதிர்கா மத்தோன் இகலுடைக் கரவேல் காக்க.
லகரமே போல் காளிங்கன்நல்லுடல் நெளிய நின்று
தகர மர்த்தனமே செய்த சங்கரி மருகன் கைவேல்,
நிகழ்எனை நிருதி திக்கில் நிலைபெறக் காக்க, மேற்கில்
இகல் அயில்காக்க, வாயுவினில் குகன் கதிர்வேல் காக்க.
வடதிசை தன்னில் ஈசன்மகன்அருள் திருவேல் காக்க
விடையுடை ஈசன் திக்கில் வேத போதகன் வேல் காக்க
நடக்கையில் இருக்கும்ஞான்றும் நவில்கையில் நிமிர்கையில், கீழ்க்
கிடக்கையில் தூங்குஞான்றும் கிரிதுளைத்துள வேல்காக்க.
இழந்துபோகாத வாழ்வை ஈயும் முத்தையனார் கைவேல்,
வழங்கும் நல் ஊண் உண்போதும் மால்விளையாட்டின் போதும்
பழஞ்சுரர் போற்றும் பாதம் பணிந்து நெஞ்சு அடக்கும் போதும்
செழும்குணத்தோடே காக்க, திடமுடன் மயிலும் காக்க.
இளமையில் வாலிபத்தில் ஏறிடு வயோதிகத்தில்
வளர் அறுமுகச் சிவன்தான் வந்தெனைக் காக்க காக்க
ஒளிஎழு காலை, முன்எல் ஓம் சிவ சாமி காக்க
தெளிநடு பிற்பகல் கால், சிவகுரு நாதன் காக்க.
இறகுடைக்கோழித் தோகைக்கு இறைமுன் இராவில் காக்க
திறலுடைச் சூர்ப்பகைத்தே, திகழ்பின் இராவில் காக்க
நறவுசேர் தாள் சிலம்பன் நடுநிசி தன்னில் காக்க
மறைதொழு குழகன் எம்கோன் மாறாது காக்க காக்க.
இனம்எனத் தொண்டரோடும் இணக்கிடும் செட்டி காக்க
தனிமையில் கூட்டந் தன்னில் சரவண பவனார் காக்க
நனி அநுபூதி சொன்ன நாதர்கோன் காக்க இத்தைக்
கனிவோடு சொன்ன தாசன் கடவுள்தான் காக்கவந்தே.
பத உரைword meanings
- அண்டமாய் அவனியாகி அறியொணாப் பொருள(து) ஆகி
பேரண்டமாகவும்(அண்டமாய்) இப்பூமியாகவும்(அவனியாகி), அறிவுக்கு எட்டாத(அறியொணாப்) பரம்பொருளாகவும் ஆகி, - தொண்டர்கள் குருவுமாகித் துகள் அறு தெய்வமாகி
தன் தொண்டர்களுக்குக்(தொண்டர்கள்) குருவாகவும், குற்றமற்ற(துகள் அறு) தெய்வமாகவும்(தெய்வமாகி) விளங்கி, - எண்திசை போற்ற நின்ற என்அருள் ஈசன் ஆன
எட்டுத் திசைகளும்(எண்திசை) போற்றி(போற்ற) நிற்கும்படி நின்ற, எனது அருளுடைய இறைவனாகிய(ஈசன்) - திண்திறல் சரவணத்தான் தினமும் என் சிரசைக் காக்க
வலிமை மிக்க(திண்திறல்) சரவணப் பொய்கையில் தோன்றியவன்(சரவணத்தான்), நாள்தோறும்(தினமும்) என் தலையைக் காக்க என்று இப்பாடல் வேண்டுகிறது. - ஆதியாம் கயிலைச் செல்வன் அணிநெற்றி தன்னைக் காக்க
தெய்வங்களுள் முதன்மையான(ஆதியாம்) கயிலையின் செல்வனாகிய(கயிலைச் செல்வன்) முருகன், அழகிய நெற்றியைக்(அணிநெற்றி) காக்க என வேண்டுகிறது. - தாதவிழ் கடப்பந் தாரான் தானிரு நுதலைக் காக்க
மகரந்தம் மலரும்(தாதவிழ்) கடப்ப மலர் மாலை அணிந்தவன் (முருகனுக்குரிய அடையாள மலர்), இரு புருவங்களையும்(நுதலை) காக்க. - சோதியாம் தணிகை ஈசன் துரிசுஇலா விழியைக் காக்க
ஒளிவடிவினனாய்(சோதியாம்) திருத்தணி மலையில் எழுந்தருளிய இறைவன் (ஆறுபடை வீடுகளுள் ஒன்று), குற்றமற்ற(துரிசுஇலா) கண்களைக்(விழியைக்) காக்க. - நாதனாம் கார்த்தி கேயன் நாசியை நயந்து காக்க
கனிந்த அருள் கொண்டு, கார்த்திகைப் பெண்டிர் ஆறுபேர் வளர்த்ததால் 'கார்த்திகேயன்' எனப் பெயர்பெற்ற தலைவன்(நாதனாம்), அன்புடன்(நயந்து) மூக்கைக்(நாசியை) காக்க. - இருசெவிகளையும் செவ்வேள் இயல்புடன் காக்க
செவ்வேளாகிய முருகன், ஒவ்வொரு காதின் இயல்புக்கேற்ப(இயல்புடன்) இரு செவிகளையும்(இருசெவிகளையும்) காக்க. - வாயை முருகவேள் காக்க, நாப்பல் முழுதும் நல் குமரன் காக்க
முருகவேள் வாயையும்(வாயை), நல் குமரன் நாவையும் பற்கள் அனைத்தையும்(நாப்பல் முழுதும்) காக்க. - துரிசறு கதுப்பை யானைத் துண்டனார் துணைவன் காக்க
யானைத் துண்டனாரின் (விநாயகரின்) இளைய சகோதரனான(துணைவன்) முருகன், குற்றமற்ற(துரிசறு) கன்னங்களைக்(கதுப்பை) காக்க. - திருவுடன் பிடரி தன்னைச் சிவசுப்ரமணியன் காக்க
சிவசுப்ரமணியன், செல்வத்துடன்(திருவுடன்) பிடரியையும்(பிடரி) காக்க. - ஈசனாம் வாகுலேயன் எனது கந்தரத்தைக் காக்க
கனிந்த அருள் கொண்ட இறைவனாகிய(ஈசனாம்) வாகுலேயன், என் கழுத்தைக்(கந்தரத்தைக்) காக்க. - தேசுறு தோள் விலாவும் திருமகள் மருகன் காக்க
திருமகளின் (இலட்சுமியின்) மருகனான முருகன், ஒளிபொருந்திய(தேசுறு) தோள்களையும்(தோள்) விலாப் பகுதியையும்(விலாவும்) காக்க. - ஆசிலா மார்பை ஈராறு ஆயுதன் காக்க
பன்னிரு ஆயுதங்களை உடையவன்(ஈராறு ஆயுதன்), குற்றமற்ற(ஆசிலா) மார்பைக் காக்க. - என்றன் ஏசிலா முழங்கை தன்னை எழில் குறிஞ்சிக்கோன் காக்க
எழுச்சியுடைய(எழில்) மலைநிலங்களின் அதிதெய்வமான குறிஞ்சிக் கோனாகிய(குறிஞ்சிக்கோன்) முருகன், குற்றமற்ற(ஏசிலா) என் முழங்கைகளைக் காக்க. - உறுதியாய் முன்கை தன்னை உமையிள மதலை காக்க
உமையின் இளம் மைந்தன்(உமையிள மதலை), முன்கையை(முன்கை) உறுதியுடன்(உறுதியாய்) காக்க. - தறுகண் ஏறிடவே என்கைத் தலத்தை மாமுருகன் காக்க
மாமுருகன், அஞ்சாமை மிகும்படி(தறுகண் ஏறிடவே) என் கை உள்ளங்கையைக்(தலத்தை) காக்க. - புறம்கையை அயிலோன் காக்க
வேலேந்திய(அயிலோன்) முருகன், கையின் புறப் பகுதியைக்(புறம்கையை) காக்க. - பொறிக்கர விரல்கள் பத்தும் பிறங்கு மால்மருகன் காக்க, பின்முதுகைச் சேய் காக்க
ஒளிர்பொருந்திய(பிறங்கு) மால்மருகன், தொழில் கருவியான(பொறிக்கர) பத்து விரல்களையும்(விரல்கள் பத்தும்) காக்க, செவ்வொளி இளந்தெய்வமான சேயாகிய முருகன், முதுகின் மேற்பகுதியையும்(பின்முதுகைச்) காக்க. - ஊண்நிறை வயிற்றை மஞ்ஞை ஊர்த்தியோன் காக்க
மயில் வாகனனாகிய(மஞ்ஞை ஊர்த்தியோன்) முருகன், உணவு நிறைந்த வயிற்றைக்(ஊண்நிறை வயிற்றை) காக்க. - தோள்நிமிர் சுரேசன் உந்திச் சுழியினைக் காக்க
தோள் உயர்ந்த(தோள்நிமிர்) சுரேசன், தொப்புள் சுழியைக்(உந்திச் சுழியினைக்) காக்க. - குய்யநாணினை அங்கி கெளரிநந்தனன் காக்க
அங்கியில் தோன்றிய கௌரியின் மைந்தன்(அங்கி கெளரிநந்தனன்), மறைவான, விதை தாங்கும் உறுப்பைக்(குய்யநாணினை) காக்க. - பீஜ ஆணியை கந்தன் காக்க, அறுமுகன் குதத்தைக் காக்க
கந்தன், விரையிடையே விளங்கும் நரம்போட்டத்தை(பீஜ ஆணியை) காக்க, அறுமுகன், குதத்தையும் காக்க. - எஞ்சிடாது இடுப்பை வேலுக்கு இறைவனார் காக்க காக்க
வேலுக்கு இறைவனாகிய முருகன், இடுப்பைக்(இடுப்பை) குறையாமல் எப்போதும்(எஞ்சிடாது) காக்க. - அம்சகனம் ஓர் இரண்டும் அரன்மகன் காக்க காக்க
அரன் மகனாகிய முருகன், இரு பிருஷ்டப் பகுதிகளையும்(அம்சகனம் ஓர் இரண்டும்) காக்க. - விஞ்சிடு பொருள் காங்கேயன் விளரடித் தொடையைக் காக்க
மேலான(விஞ்சிடு) பொருளாகிய, கங்கையின் மைந்தனான காங்கேயன், பிரிந்த(விளரடித்) தொடைகளைக்(தொடையைக்) காக்க. - செஞ்சரண நேச ஆசான் திமிரு முன் தொடையைக் காக்க
சிவந்த திருவடிகளையுடைய(செஞ்சரண), ஆன்மாவை நேசிக்கும்(நேச) ஆசான், வலிமை மிக்க(திமிரு) முன் தொடையைக் காக்க. - ஏரகத் தேவன் என்தாள் இரு முழங்காலும் காக்க
ஏரகத்தில் (சுவாமிமலையில்) எழுந்தருளிய தேவன், என் இரு முழங்கால்களையும்(இரு முழங்காலும்) காக்க. - சீருடைக் கணைக்கால் தன்னைச் சீரலைவாய்த்தே காக்க
சீரலைவாயில் (திருச்செந்தூரில்) எழுந்தருளியவன், சிறப்புமிக்க(சீருடைக்) கணைக்காலைக்(கணைக்கால்) காக்க. - நேருடைப் பரடு இரண்டும் நிகழ் பரங்கிரியன் காக்க
பரங்கிரியில் (திருப்பரங்குன்றத்தில்) விளங்கும்(நிகழ்) இறைவன், நேரான(நேருடை) இரு கணுக்கால்களையும்(பரடு இரண்டும்) காக்க. - சீரிய குதிக்கால் தன்னைத் திருச்சோலை மலையன் காக்க
திருச்சோலை மலையன் (அழகர் கோயில்), சிறப்புமிக்க(சீரிய) குதிகாலைக்(குதிக்கால்) காக்க. - ஐயுறு மலையன் பாதத்து அமர் பத்து விரலும் காக்க
மலையில் எழுந்தருளிய இறைவனின்(மலையன்) திருவடியில்(பாதத்து) அமர்ந்துள்ள பத்து விரல்களையும்(பத்து விரலும்) காக்க. - பையுறு பழநி நாத பரன், அகம் காலைக் காக்க
பசுமை நிறைந்த(பையுறு) பழநி மலையின் நாதனான இறைவன், உள்ளங்காலைக்(அகம் காலைக்) காக்க. - மெய்யுடன் முழுதும், ஆதி விமல சண்முகவன் காக்க
ஆதியும் தூயவனுமான(ஆதி விமல) சண்முகவன், உடலை முழுதும்(மெய்யுடன் முழுதும்) காக்க. - தெய்வ நாயக விசாகன் தினமும் என் நெஞ்சைக் காக்க
தெய்வத் தலைவனான(தெய்வ நாயக) விசாகன், நாள்தோறும்(தினமும்) என் நெஞ்சைக் காக்க. - ஒலியெழ உரத்த சத்தத் தொடுவரு பூத ப்ரேதம்
பேரொலியுடன்(ஒலியெழ உரத்த சத்தத்) வரும் பூதங்களும்(பூத) பிரேதங்களும்(ப்ரேதம்), - பலிகொள் இராக்கதப்பேய் பலகணத்து எவை ஆனாலும்
பலி கொள்ளும்(பலிகொள்) இராட்சதப் பேய்களும்(இராக்கதப்பேய்) மற்ற எத்தகைய கூட்டங்களும்(பலகணத்து எவை) ஆனாலும், - கிலிகொள எனைவேல் காக்க
இவை அச்சத்தால் ஓடும்படி(கிலிகொள) வேல் என்னைக்(எனை) காக்க. - கெடுபரர் செய்யும் சூன்யம் வலியுள மந்த்ர தந்த்ரம் வருத்திடாது அயில்வேல் காக்க
கெட்டவர்கள்(கெடுபரர்) செய்யும் வலிமையான(வலியுள) மந்திரமும் தந்திரமும்(மந்த்ர தந்த்ரம்) என்னைத் துன்புறுத்தாதபடி, கூரிய வேல் காக்க. - ஓங்கிய சீற்றமே கொண்டு உவணிவில் வேல் சூலங்கள்
மிகுந்த சினத்துடன்(ஓங்கிய சீற்றமே), உவணி என்னும் வாள், வில், வேல், சூலம்(சூலங்கள்), - தாங்கிய தண்டம் எஃகம் தடி பரசு ஈட்டி யாதி
தண்டாயுதம்(தண்டம்), எஃகம் என்னும் சக்கரம், தடி-பரசு என்னும் மழு, ஈட்டி முதலான(யாதி) படைக்கலன்கள், - பாங்குடை ஆயுதங்கள் பகைவர் என் மேலே ஓச்சின்
அழிக்கும் தன்மையுடைய(பாங்குடை) இத்தகைய ஆயுதங்களைப் பகைவர் என் மீது ஓங்கினாலும்(மேலே ஓச்சின்), - தீங்கு செய்யாமல் என்னைத் திருக்கைவேல் காக்க காக்க
எனக்குத் தீங்கு நேராதபடி(தீங்கு செய்யாமல்), திருக்கையில் உள்ள வேல்(திருக்கைவேல்) காக்க. - ஒளவியமுளர் ஊன் உண்போர் அசடர் பேய் அரக்கர் புல்லர்
பொறாமை உடையவரோ(ஒளவியமுளர்), தசை(ஊன்) உண்போரோ, மூடரோ(அசடர்), பேயோ, அரக்கரோ, அற்ப அறிவினரோ(புல்லர்), - தெவ்வர்கள் எவர் ஆனாலும் திடமுடன் எனைமற் கட்டத் தவ்வியே வருவா ராயிற்
பகைமைக் குணம் நிறைந்த தெவ்வர் எவரானாலும்(தெவ்வர்கள் எவர் ஆனாலும்), உறுதியுடன்(திடமுடன்) மற்போர்(மற்) புரிந்து என்னைக்(எனை) கட்டிப் பிடிக்கத் தாவிப் பாய்ந்து(தவ்வியே) வருவாராயின்(ராயிற்), - சராசரம் எலாம் புரக்கும்
அசையும் அசையாத அனைத்தையும்(சராசரம் எலாம்) காக்கும்(புரக்கும்) சூரசண்டனின், - கவ்வுடைச் சூர சண்டன் கைஅயில் காக்க காக்க
பற்றிப் பிடிக்கும்(கவ்வுடைச்) சூரனுக்கு எமனைப் போன்ற பெருமானின் திருக்கை அயில்(கைஅயில்) என்னைக் காக்க காக்க. - கடுவிடப் பாந்தள் சிங்கம் கரடி நாய் புலிமா யானை
நச்சுடைய(கடுவிடப்) பாம்பு(பாந்தள்), சிங்கம், கரடி, நாய், புலி, குதிரை(மா), யானை, - கொடிய கோணாய் குரங்கு கோல மார்ச்சாலம் சம்பு
கொடிய ஓநாய்(கோணாய்), குரங்கு, பல நிறமுடைய பூனை(கோல மார்ச்சாலம்), நரி(சம்பு) முதலிய, - நடையுடை எதனா லேனும் நான் இடர்ப் பட்டி டாமல்
நடமாடும்(நடையுடை) இவற்றுள் எதனாலும்(எதனா லேனும்) நான் துன்பப்படாதபடி(இடர்ப் பட்டி டாமல்), - சடிதியில் வடிவேல் காக்க சானவிமுளை வேல் காக்க
விரைந்து(சடிதியில்) வரும் வடிவேலும், சானவி எனும் கங்கையின் மைந்தனாகிய(முளை) முருகனின் வேலும் காக்க. - ஙகரமே போல் தழீஇ ஞானவேல் காக்க
ஙகர மெய்யெழுத்து(ஙகரமே) தன் இனத்தைத் தழுவியிருப்பதைப்(தழீஇ) போல, ஞானவேல் என்னையும் என் இனத்தாரையும் தழுவிக் காக்க. - வன்புள் சிகரிதேள் நண்டுக் காலி செய்யன் ஏறு ஆலப் பல்லி
கொடிய பறவைகள்(வன்புள்), எலி(சிகரி), தேள், நண்டுக்காலி, வலிய செய்யான்(செய்யன் ஏறு), நச்சுப் பல்லி(ஆலப் பல்லி) ஆகியவற்றால், - நகமுடை ஓந்தி பூரான் நளிவண்டு புலியின் பூச்சி
நகமுடைய(நகமுடை) ஓணான்(ஓந்தி), பூரான், மென்மையான உடலுடைய வண்டு(நளிவண்டு), சிலந்தி(புலியின் பூச்சி) ஆகியவற்றால், - உகமிசை இவையால், எற் குஓர் ஊறுஇலாது ஐவேல் காக்க
இந்த உலகில் உள்ள(உகமிசை) இவற்றால் எனக்கு(எற்) எந்தத் தீங்கும் நேராதபடி(குஓர் ஊறுஇலாது), அற்புதமான வேல்(ஐவேல்) காக்க. - சலத்தில் உய்வன்மீன் ஏறு, தண்டுடைத் திருக்கை, மற்றும்
நீருள் வாழும் ஆண்மையுள்ள முதலையும்(சலத்தில் உய்வன்மீன் ஏறு), கூரிய கொம்புடைய(தண்டுடைத்) திருக்கை மீனும், இன்னும்(மற்றும்) பிற நீர்வாழ் உயிரினங்களும், - நிலத்திலும் சலத்திலும் தான் நெடுந்துயர் தரற்கே உள்ள
நிலத்திலும் நீரிலும்(சலத்திலும்) நீண்ட துன்பம் தரும்(நெடுந்துயர் தரற்கே) உயிரினங்கள் அனைத்தாலும், - குலத்தினால், நான் வருத்தம் கொண்டிடாது அவ்வவ்வேளை
அத்தகைய உயிரினக் கூட்டத்தாலும்(குலத்தினால்) நான் வருத்தமடையாதபடி(வருத்தம் கொண்டிடாது), அந்தந்த வேளையிலெல்லாம்(அவ்வவ்வேளை) - பலத்துடன் இருந்து காக்க, பாவகி கூர்வேல் காக்க
உக்கிர உறுதியுடன்(பலத்துடன்) என்னுடன் நின்று உதவ வேண்டும்; அக்கினியில் பிறந்தவனும்(பாவகி), உணர்வெனும் நெருப்பிலிருந்து உதித்தவனுமான முருகனின் கூர்மையான வேல்(கூர்வேல்) காக்க வேண்டும். - ஞமலியம் பரியன்கைவேல், நவக்கிரகக்கோள் காக்க
மயிலை வாகனமாகக் கொண்ட(ஞமலியம்) முருகனின்(பரியன்) கைவேலானது, நவக்கிரகத் தீங்கிலிருந்து(நவக்கிரகக்கோள்) காக்க. - சுமவிழி நோய்கள், தந்த சூலை, ஆக்கிராண ரோகம்
கண் நோய்கள்(சுமவிழி நோய்கள்), பல் குத்துவது போன்ற வலி(தந்த சூலை), நீடித்த சளி நோயிலிருந்தும்(ஆக்கிராண ரோகம்), - திமிர்கழல் வாதம், சோகை, சிரமடி கர்ண ரோகம்
திமிர் நோயும், கால்களை மரத்துப்போகச் செய்யும் வாதமும்(திமிர்கழல் வாதம்), இரத்த சோகை, தலைவலி(சிரமடி), காது நோயிலிருந்தும்(கர்ண ரோகம்), - எமை அணுகாமலே பன்னிருபுயன் சயவேல் காக்க
இவை என்னை நெருங்காதபடி, பன்னிரு தோள்(பன்னிருபுயன்) முருகனின் வெற்றி வேல்(சயவேல்) காக்க. - டமருகத்து அடிபோல் நைக்கும் தலையிடி
தமருக அடி போன்று(டமருகத்து அடிபோல்) வாட்டும் தலைவலியிலிருந்தும்(தலையிடி), - கண்ட மாலை, குமுறு விப்புருதி, குன்மம், குடல்வலி, ஈழை காசம்
கழுத்துக் கண்டமாலை(கண்ட மாலை), இரைச்சலுடன் வரும் சிலந்திப்புண்ணிலிருந்தும்(குமுறு விப்புருதி), குன்மம், குடல் வலி, கப நோயும், காச நோயும்(ஈழை காசம்), - நிமிரொணா(து) இருத்தும் வெட்டை, நீர்பிரமேகம் எல்லாம்
நிமிர முடியாதபடி படுக்கையாக்கும் வெப்பநோயிலிருந்தும்(இருத்தும் வெட்டை), நீர்கோத்த மேக வியாதிகள் அனைத்திலிருந்தும்(நீர்பிரமேகம்), - எமை அடையாமலே குன்று எறிந்தவன் கைவேல் காக்க
இவை என்னை அடையாமல், மலையைப் பிளந்த(குன்று எறிந்தவன்) முருகனின் கைவேல் காக்க. - இணக்கம் இல்லாத பித்த எரிவு
கட்டுப்பாடு இல்லாத(இணக்கம் இல்லாத) பித்த எரிச்சலிலிருந்தும்(பித்த எரிவு), - மாசுரங்கள், கைகால் முணக்கவே குறைக்கும் குஷ்டம், மூலவெண்முளை, தீமந்தம்
பெரும் ஜுர நோய்களிலிருந்தும்(மாசுரங்கள்), கை கால்களைச் சுருக்கிக் குறுக்கும் குஷ்டநோய், வெண்ணிற மூல முளையிலிருந்தும்(மூலவெண்முளை), செரிமானக் குறைபாட்டிலிருந்தும்(தீமந்தம்), - சணத்திலே கொல்லும் சன்னி சாலம்
நொடிப்பொழுதில்(சணத்திலே) கொல்லக்கூடிய சன்னி வலிப்பு என்று அழைக்கப்படும்(சன்னி சாலம்), - பிணிக்குலம் எனை ஆளாமல் பெரும்சத்தி வடிவேல் காக்க
இந்தப் பிணிக் கூட்டம்(பிணிக்குலம்) என்னை ஆட்கொள்ளாதபடி, பெரும் சத்தி வடிவான(பெரும்சத்தி வடிவேல்) வேல் காக்க. - தவனமா ரோகம், வாதம், சயித்தியம், அரோசகம்
எவ்வளவு நீர் அருந்தினும் தணியாத நாவரட்சி தரும் பெருநோயிலிருந்தும்(தவனமா ரோகம்), வாதநோய், சீதள நோய்(சயித்தியம்), உணவில் விருப்பமின்மையிலிருந்தும்(அரோசகம்), - மெய் சுவறவே செய்யும் மூலச்சூடு, இளைப்பு, உடற்று விக்கல்
உடல் மெலியும்படி(மெய் சுவறவே) செய்யும் மூலச்சூடு, சோர்வு(இளைப்பு), விக்கலிலிருந்தும்(உடற்று விக்கல்), - அவதிசெய் பேதி சீழ்நோய், அண்டவாதங்கள், சூலை
வருத்தும் வயிற்றுப்போக்கு(அவதிசெய் பேதி), சீழ் நோய், வாதத்தால் இனப்பெருக்க உறுப்புகளில் வரும் நோய்களிலிருந்தும்(அண்டவாதங்கள்), சூலை வலியிலிருந்தும், - எவையும் என்னிடத்து எய்தாமல் எம்பிரான் திணிவேல் காக்க
இவை எதுவும் என்னை அணுகாதபடி, எம்பிரானின் உறுதி வேல்(திணிவேல்) காக்க. - நமைப்புறு கிரந்தி, வீக்கம், நணுகிடு பாண்டு, சோபம்
நமைச்சல் தரும் கிரந்தி நோயிலிருந்தும்(நமைப்புறு கிரந்தி), வீக்கம், உடல் வீக்கம் தரும் பாண்டு நோயிலிருந்தும்(பாண்டு), சோர்வு தரும் சோபத்திலிருந்தும்(சோபம்), - அமர்த்திடு கருமை வெண்மை ஆகுபல் தொழுநோய், கக்கல்
கருமை வெண்மை நிறமாக உண்டாகும் பலவகைத் தொழுநோயிலிருந்தும்(ஆகுபல் தொழுநோய்), வாந்தியிலிருந்தும்(கக்கல்), - இமைக்குமுன் உறு வலிப்போடு எழுபுடைப்பகந்த ராதி
இமைப்பதற்கு முன்(இமைக்குமுன்) உண்டாகும் இழுப்பு நோயும்(வலிப்போடு), விம்மிக் குத்தி வலியுண்டாக்கும் பகந்தரம் முதலிய நோய்களிலிருந்தும்(எழுபுடைப்பகந்த ராதி), - இமைப்பொழுதேனும் என்னை எய்தாமல் அருள்வேல் காக்க
இவை ஒரு கண் இமைக்கும் நேரமேனும்(இமைப்பொழுதேனும்) என்னை அணுகாதபடி, அருள் வேல் காக்க. - பல்லது கடித்து மீசை படபடென்றே துடிக்க
பல்லைக் கடித்து(பல்லது கடித்து), மீசை படபடத்து அதிரும்(மீசை படபடென்றே துடிக்க) அந்த உருவம், - கல்லினும் வலிய நெஞ்சம் காட்டியே உருட்டி நோக்கி
கல்லைக் காட்டிலும் கடினமான(கல்லினும் வலிய) நெஞ்சத்துடன், கண்களைச் சுழற்றிப் பார்த்து(உருட்டி நோக்கி), - எல்லினும் கரிய மேனி எமபடர் வரினும் என்னை
இருளையும் விடக் கரிய(எல்லினும்) மேனி கொண்ட எமதூதன்(எமபடர்) என்னை நோக்கி வந்தாலும்(வரினும்), - ஒல்லையில் தார காரி ஓம் ஐம் ரீம் வேல் காக்க
தாரகாசுரனை அழித்த(தார காரி) இறைவனின் ஓம், ஐம், ரீம் என்னும் பீஜ எழுத்துகளுடன் கூடிய வேல் விரைந்து(ஒல்லையில்) வந்து என்னைக் காக்க. - மண்ணிலும் மரத்தின்மீது மலையிலும் நெருப்பின் மீதும்
நிலத்திலும்(மண்ணிலும்), மரத்தின் மேலும்(மரத்தின்மீது), மலையிலும், நெருப்பிலும்(நெருப்பின் மீதும்), - தண்ணிறை ஜலத்தின் மீதும் சாரி செய் ஊர்தி மீதும்
நீர் நிறைந்த நீரிலும்(தண்ணிறை ஜலத்தின் மீதும்), ஓடும் வாகனத்திலும்(சாரி செய் ஊர்தி மீதும்), - விண்ணிலும் பிலத்தின் உள்ளும் வேறு எந்த இடத்தும் என்னை
வானத்திலும்(விண்ணிலும்), பாதாளத்திலும்(பிலத்தின் உள்ளும்), வேறு எந்த இடத்திலும் நான் இருந்தாலும், - நண்ணிவந்து அருள் ஆர்சஷ்டி நாதன் வேல் காக்க காக்க
என்னை நெருங்கி வந்து(நண்ணிவந்து), அருள் நிறைந்த சஷ்டிநாதனின்(ஆர்சஷ்டி நாதன்) வேல் காக்க, காக்க. - யகரமேபோல் சூல் ஏந்தும் நறும்புயன் வேல்முன் காக்க
'ய' என்னும் எழுத்து வடிவில்(யகரமேபோல்), திரிசூலம் ஏந்திய(சூல் ஏந்தும்) நறுமணத் தோள்(நறும்புயன்) முருகனின் வேல் முன்புறம் காக்க. - அகரமே முதலாம் ஈராறு அம்பகன் வேல்பின் காக்க
'அ' என்னும் எழுத்தில் தொடங்கும்(அகரமே முதலாம்) பன்னிரு கண்களை உடையவனின்(ஈராறு அம்பகன்) முருகனின் வேல் பின்புறம் காக்க. - சகரமோடு ஆறும் ஆனோன் தன்கைவேல் நடுவில் காக்க
'ச' என்னும் எழுத்துடன் கூடிய(சகரமோடு), ஆறெழுத்தையே தன் பெயராகக் கொண்ட பெருமானின்(ஆறும் ஆனோன்) சொந்தக் கைவேல் நடுவில் காக்க. - சிகரமின் தேவ மோலி திகழ் ஐவேல் கீழ்மேல் காக்க
சிகரம் போல் விளங்கும் தெய்வ மகுடம் அணிந்த பிரானின்(சிகரமின் தேவ மோலி) விளங்கும் முதன்மை வேல்(திகழ் ஐவேல்), மேலும் கீழும் காக்க. - ரஞ்சித மொழி தேவானை நாயகன் வள்ளி பங்கன்
இனிய சொல்லுடைய(ரஞ்சித மொழி) தேவசேனையின் தலைவன்(தேவானை நாயகன்), வள்ளியின் மணாளன்(வள்ளி பங்கன்), - செஞ்சய வேல் கிழக்கில் திறமுடன் காக்க
அவனது வெற்றி வேல்(செஞ்சய வேல்) கிழக்குத் திசையில் வலிமையுடன்(திறமுடன்) காக்க; - அங்கி விஞ்சிடு திசையில் ஞான வீரன் வேல் காக்க
தென்கிழக்கு அக்னி(அங்கி) திசையில், மேலோங்கும்(விஞ்சிடு) ஞானவீரனின் வேல் காக்க; - தெற்கில் எஞ்சிடாக் கதிர்கா மத்தோன் இகலுடைக் கரவேல் காக்க
தெற்கில், பின் வாங்காத(எஞ்சிடாக்) கதிர்காம முருகனின்(கதிர்கா மத்தோன்) பகையை அழிக்கும் திருக்கை வேல்(இகலுடைக் கரவேல்) காக்க. - லகரமே போல் காளிங்கன் நல்லுடல் நெளிய நின்று
'ல' என்னும் எழுத்து வடிவில்(லகரமே போல்) நின்று, காளிங்க நாகத்தின் பெரிய உடலை(காளிங்கன் நல்லுடல்) நெளியச் செய்து (இதை 'காளிங்கன் அல் உடல்' எனப் பிரித்து, இருண்ட உடல் எனவும் கொள்ளலாம்), - தகர மர்த்தனமே செய்த சங்கரி மருகன் கைவேல்
அவ்வாறு அடக்கிய(தகர மர்த்தனமே செய்த) சங்கு ஏந்திய திருமாலின்(சங்கரி) மருகனான(மருகன்) முருகனின் கைவேல், - நிகழ்எனை நிருதி திக்கில் நிலைபெறக் காக்க
தென்மேற்குத் திசையான நிருதி திக்கில் என்னை உறுதியாய் நிலைநிறுத்திக்(நிலைபெறக்) காக்க; - மேற்கில் இகல் அயில்காக்க, வாயுவினில் குகன் கதிர்வேல் காக்க
மேற்கில் பகைமையிலிருந்து(இகல்) வேல்(அயில்) காக்க; வாயு திசையான வடமேற்கில் குகனின் ஒளிவேல்(கதிர்வேல்) காக்க. - வடதிசை தன்னில் ஈசன்மகன் அருள் திருவேல் காக்க
வடக்குத் திசையில்(வடதிசை தன்னில்), ஈசன் மகனான முருகனின் அருள்மிகு திருவேல் காக்க. - விடையுடை ஈசன் திக்கில் வேத போதகன் வேல் காக்க
காளை ஏறும் ஈசான்யன்(விடையுடை ஈசன்) காக்கும் வடகிழக்குத் திசையில்(திக்கில்), வேதப் பொருளை உபதேசித்த(வேத போதகன்) முருகனின் வேல் காக்க. - நடக்கையில் இருக்கும் ஞான்றும் நவில்கையில் நிமிர்கையில்
நடக்கும்போதும், இருக்கும்போதும், பேசும்போதும்(நவில்கையில்), நிமிர்ந்து எழும்போதும், - கீழ்க்கிடக்கையில் தூங்குஞான்றும் கிரிதுளைத்துள வேல் காக்க
கீழே படுத்திருக்கும் போதும், உறங்கும் போதும், கிரவுஞ்ச மலையைத் துளைத்த(கிரிதுளைத்துள) வேல் காக்க. - இழந்துபோகாத வாழ்வை ஈயும் முத்தையனார் கைவேல்
இழந்துபோகாத (அழியாத) வாழ்வை அளிக்கும்(ஈயும்) முத்தையனாரின் கைவேல், - வழங்கும் நல் ஊண் உண்போது மால் விளையாட்டின் போதும்
அவன் அளிக்கும் நல்ல உணவை(வழங்கும் நல் ஊண்) உண்ணும் போதும், மயக்கம் தரும்(மால்) விளையாட்டு நடக்கும் போதும், - பழஞ்சுரர் போற்றும் பாதம் பணிந்து நெஞ்சு அடக்கும் போதும்
பழம் தேவர்களும்(பழஞ்சுரர்) போற்றும் திருவடிகளை வணங்கி(பாதம் பணிந்து), மனதை அடக்கும் போதும், - செழும்குணத்தோடே காக்க, திடமுடன் மயிலும் காக்க
திருவருள் நிறைந்த(செழும்) குணத்துடன் காக்க; உறுதியாய்(திடமுடன்) மயிலும் காக்க. - இளமையில் வாலிபத்தில் ஏறிடு வயோதிகத்தில்
இளமைப் பருவத்திலும், இளைஞர் பருவத்திலும்(வாலிபத்தில்), முதிர்ந்த வயதிலும்(ஏறிடு வயோதிகத்தில்), - வளர் அறுமுகச் சிவன்தான் வந்தெனைக் காக்க காக்க
வளர்ந்தோங்கும்(வளர்) அறுமுக சிவன் தானே(சிவன்தான்) வந்து என்னைக்(வந்தெனை) காக்க, காக்க. - ஒளிஎழு காலை முன்எல் ஓம் சிவ சாமி காக்க
ஒளி எழும் அதிகாலையிலும்(ஒளிஎழு காலை), முற்பகலிலும்(முன்எல்), ஓம் சிவ சாமி காக்க. - தெளிநடு பிற்பகல் கால் சிவகுரு நாதன் காக்க
தெளிந்த நண்பகலிலும்(தெளிநடு), பிற்பகலிலும், சிவகுரு நாதன் காக்க. - இறகுடைக் கோழித் தோகைக்கு இறை முன் இராவில் காக்க
இறகுகொண்ட சேவல்(இறகுடைக் கோழி) மற்றும் மயில் கொடியுடைய(தோகைக்கு) தலைவன்(இறை), முன்னிரவில் காக்க. - திறலுடைச் சூர்ப்பகைத்தே திகழ்பின் இராவில் காக்க
வலிமைமிக்க(திறலுடைச்) சூரபத்மனை அழித்தவன்(சூர்ப்பகைத்தே), விளங்கும் இரவின் பிற்பகுதியில்(திகழ்பின்) காக்க. - நறவுசேர் தாள் சிலம்பன் நடுநிசி தன்னில் காக்க
தேன் மணம் கமழும்(நறவுசேர்) திருவடிச் சிலம்பு அணிந்தவன்(தாள் சிலம்பன்), நடு இரவில்(நிசி) காக்க. - மறைதொழு குழகன் எம்கோன் மாறாது காக்க காக்க
வேதங்கள் போற்றும்(மறைதொழு) என்றும் இளமையான(குழகன்) என் தலைவன்(எம்கோன்), எல்லா யாமங்களிலும் மாறாமல் காக்க, காக்க. - இனம்எனத் தொண்டரோடும் இணக்கிடும் செட்டி காக்க
தொண்டர்களுடன் இனமெனப் பழகும்(இணக்கிடும்), ஞானமும் செல்வமும் நிறைந்த செட்டியாகிய முருகன் காக்க. - தனிமையில் கூட்டந் தன்னில் சரவண பவனார் காக்க
தனிமையில் இருந்தாலும், கூட்டத்தில் இருந்தாலும், சரவணபவனார் காக்க. - நனி அநுபூதி சொன்ன நாதர்கோன் காக்க இத்தை
சிறந்த(நனி) அநுபூதி நூலைத் தம் திருவாய் மலர்ந்தருளிச் சொன்ன, அருணகிரிநாதரை ஆட்கொண்ட தலைவன்(நாதர்கோன்), இந்தப் பாராயணத்தையே(இத்தை) காக்க. - கனிவோடு சொன்ன தாசன் கடவுள்தான் காக்கவந்தே
உருகிய நெஞ்சுடன்(கனிவோடு) இதைப் பாடிய தாசன் வணங்கும் கடவுள் தானே(கடவுள்தான்) வந்து காக்க(காக்கவந்தே).
இயற்றியவர் Poet
ஸ்ரீமத் பாம்பன் குமரகுருதாச சுவாமிகள்Pamban Swamigal