நலம்வேண்டின் நாணுடைமை வேண்டும் குலம்வேண்டின் வேண்டுக யார்க்கும் பணிவு.
nalamvENTin nANuTaimai vENTum kulamvENTinvENTuka yArkkum paNivu
P. Kavina
பொருள் / உரை
முருகா எளிய உரை
ஒருவன் தனக்கு நிலையான நன்மைகளும் புகழும் கிடைக்க விரும்பினால் பழிக்கு நாணும் பண்பு வேண்டும்; தன் குடியின் பெருமை மேலோங்க விரும்பினால் எல்லோரிடமும் தலைக்கனமின்றிப் பணிவுடன் நடக்க வேண்டும்.
• நலம் வேண்டின் = ஒருவன் தனக்கு அழியாத புகழும் புண்ணியமும் தரும் நன்மையை விரும்பினால்,• நாண் உடைமை வேண்டும் = பழிபாவங்களுக்கு நாணும் உணர்வைப் பெற்றிருக்க வேண்டும்;• குலம் வேண்டின் = தன் குடியின் உயர்வும் மேன்மையும் விளங்க விரும்பினால்,• யார்க்கும் பணிவு வேண்டுக = யாவரிடத்திலும் பணிவோடு நடக்கும் பண்பைப் போற்ற வேண்டும்.
மு.வரதராசன்
ஒருவனுக்கு நன்மை வேண்டுமானால் நாணம் உடையவனாக வேண்டும், குடியின் உயர்வு வேண்டுமானால் எல்லோரிடத்தும் பணிவு வேண்டும்.
பரிமேலழகர்
நலம் வேண்டின் நாண் உடைமை வேண்டும் - ஒருவன் தனக்கு நலனுடைமையை வேண்டுவானாயின், தான் நாணுடையன் ஆதலை வேண்டுக; குலம் வேண்டின் யாரக்கும் பணிவு வேண்டுக - குலனுடைமையை வேண்டுவானாயின், பணியப்படுவார் யாவர் மாட்டும் பணிதலை வேண்டுக. (நலம் - புகழ் புண்ணியங்கள். 'வேண்டும்' என்பது. விதிப் பொருட்டாய் நின்றது. 'வினைப்படு தொகுதியின் உம்மை வேண்டும்' (தொல்.சொல்.கிளவி.33) என்புழிப்போல,'அந்தணர் சான்றோர் அருந்தவத்தோர் தம்முன்னோர் தந்தை தாய் என்றிவர்' எல்லாரும் அடங்க 'யாரக்கும்' என்றார். பணிவு - இருக்கை எழலும் எதிர் செலவும் முதலாயின. இவை இரண்டு பாட்டானும் குடிமைக்கு வேண்டுவன கூறப்பட்டன.)
சாலமன் பாப்பையா
ஒருவன் தனக்கு நன்மை வேண்டும் என்று எண்ணினால் அவனிடம் நாணம் இருக்க வேண்டும். நற்குடும்பத்தவன் என்ற பெயர் வேண்டும் என்றால், எல்லாரிடமும் பணிவு இருக்க வேண்டும்.
Meaning in English
Who seek for good the grace of virtuous shame must know; Who seek for noble name to all must reverence show