இழிவறிந்து உண்பான்கண் இன்பம்போல் நிற்கும்கழிபேர் இரையான்கண் நோய்.
izhivaRin tuNpAnkaN inpampOl niRkumkazhipEr iraiyAnkaN nOy
தமிழ்ப்பித்தர்கள்
பொருள் / உரை
முருகா எளிய உரை
சொல் பொருள் (பதவுரை):• இழிவு அறிந்து உண்பான்கண் = செரிமானக் குறைவை அறிந்து அளவோடு உண்பவனிடம்,• இன்பம் போல் நிற்கும் = உடல் நலம் தரும் இன்பம் நிலைத்து நிற்பது போல,• கழிபேர் இரையான்கண் = அளவுக்கு மீறிப் பேராசையோடு உணவை விழுங்குபவனிடம்,• நோய் நிற்கும் = நோய்கள் நீங்காமல் நிலைத்து நிற்கும்.எளிய விளக்கம்:தன்னுடைய செரிமான அளவுக்கு ஏற்பக் குறைவாக உண்பவனிடம் ஆரோக்கிய இன்பம் நிலைத்து நிற்பது போல, அளவுக்கு அதிகமாக வயிறு நிரம்ப விழுங்குபவனிடம் நோய்கள் நீங்காமல் தங்கிவிடும்.
மு.வரதராசன்
குறைந்த அளவு இன்னதென்று அறிந்து உண்பவனிடத்தில் இன்பம் நிலைநிற்பது போல, மிகப்பெரிதும் உண்பவனிடத்தில் நோய் நிற்க்கும்.
பரிமேலழகர்
இழிவு அறிந்து உண்பான்கண் இன்பம்போல் - அக்குறைதலை நன்று என்று அறிந்து அவ்வாறே உண்பவன் மாட்டு இன்பம் நீங்காது நிலை நிற்குமாறு போல; கழிபேரிரையான்கண் நோய் நிற்கும் - மிகப்பெரிய இரையை விழுங்குவான் மாட்டு நோய் நீங்காது நிலைநிற்கும்.(அவ்வாறே உண்டல் - உண்ணலாம் அளவில் சிறிது குறையஉண்டல். இன்பமாவது வாதமுதலிய மூன்றும் தத்தம் நிலையில் திரியாமையின் மனம் மொழி மெய்கள் அவன் வயத்தவாதலும், அதனான் அறம் முதலிய நான்கும் எய்தலும் ஆம். இரையை அளவின்றி எடுத்து அதனான் வருந்தும் விலங்கொடு ஒத்தலின் 'இரையான்'என்றார். விதி எதிர்மறைகளை உவமமும் பொருளும் ஆக்கியது இரண்டானும் பெறுதற்கு.)
சாலமன் பாப்பையா
குறைவாக உண்பதே நல்லது என்று அறிந்து உண்பவனிடம் இன்பம் விலகாமல் இருப்பது போல் மிக அதிகமாக விழுங்குபவனிடம் நோய் விலகாமல் இருக்கும்.
Meaning in English
On modest temperance as pleasures pure, So pain attends the greedy epicure