உடைமையுள் இன்மை விருந்தோம்பல் ஓம்பாமடமை மடவார்கண் உண்டு.
uTaimaiyuL inmai viruntOmpal OmpAmaTamai maTavArkaN uNTu
Srivardhani Kuchi
பொருள் / உரை
முருகா எளிய உரை
செல்வம் இருந்தும் வாழ்வது வறுமையே!விருந்தினரைப் போற்றாத மடமையே!அப்படிப்பட்ட மடமையானதுவே!மூடர்தம் இடத்திலே மட்டும் அதுவே!
• உடைமையுள் இன்மை = செல்வம் நிறைந்திருந்தும் தரித்திர வறுமையோடு வாழ்வதாவது,• விருந்தோம்பல் ஓம்பா = விருந்தினரை உபசரிக்காமல் புறக்கணிக்கும்• மடமை = அறியாமை (மடத்தனம்) ஆகும்;• மடவார்கண் உண்டு = அந்த மடமை அறிவற்ற மூடர்களிடமே இருக்கும்.
மு.வரதராசன்
செல்வநிலையில் உள்ள வறுமை என்பது விருந்தோம்புதலைப் போற்றாத அறியாமையாகும்: அஃது அறிவிலிகளிடம் உள்ளதாகும்.
பரிமேலழகர்
உடைமையுள் இன்மை விருந்தோம்பல் ஓம்பா மடமை -உடைமைக் காலத்து இன்மையாவது விருந்தோம்பலை இகழும் பேதைமை; மடவார்கண் உண்டு - அஃது அறிந்தார் மாட்டு உளதாகாது; பேதையார் மாட்டே உளதாம். (உடைமை - பொருளுடையனாம் தன்மை. பொருளால் கொள்ளும் பயனை இழப்பித்து உடைமையை இன்மை ஆக்கலின், மடமையை இன்மையாக உபசரித்தார்.பேதைமையான் விருந்தோம்பலை இகழின் பொருள் நின்ற வழியும் அதனால் பயன் இல்லை என்பதாம். இவை இரண்டு பாட்டானும் விருந்தோம்பா வழிப்படும் குற்றம் கூறப்பட்டது.)
சாலமன் பாப்பையா
செல்வம் இருந்தும் வறுமையாய் வாழ்வது விருந்தினரைப் பேணாமல் வாழும் மடமையே. இது மூடரிடம் மட்டுமே இருக்கும்.
Meaning in English
To turn from guests is penury, though worldly goods abound; 'Tis senseless folly, only with the senseless found