ஒலித்தக்கால் என்னாம் உவரி எலிப்பகைநாகம் உயிர்ப்பக் கெடும்.
olittakkAl ennAm uvari elippakainAkam uyirppak keTum
Amirthavarshini
பொருள் / உரை
முருகா எளிய உரை
கோழைகளான வீரர்கள் பலர் திரண்டு கடல் போல ஆரவாரம் செய்தாலும் அதனால் எந்தப் பயனும் இல்லை; நெஞ்சுரம் கொண்ட ஒரு மாவீரன் சீறி எழுந்த மாத்திரத்திலேயே அந்தக் கோழைகளின் கூட்டம் அஞ்சிச் சிதறி அழியும்.
• எலிப்பகை உவரி ஒலித்தக்கால் என்னாம் = எலிகள் கூடி கடல்போல் ஆரவாரம் செய்தாலும் என்ன பயன்?• நாகம் உயிர்ப்பக் கெடும் = நாகப்பாம்பு பெருமூச்சு விட்ட அளவிலேயே அக்கூட்டம் அழிந்துபோம்.
மு.வரதராசன்
எலியாகிய பகைக்கூடி கடல் போல் ஒலித்தாலும் என்ன தீங்கு ஏற்ப்படும், பாம்பு மூச்சு விட்ட அளவில் அவைக் கெட்டழியும்.
பரிமேலழகர்
எலிப்பகை உவரி ஒலித்தக்கால் என்னாம் - எலியாய பகை திரண்டு கடல் போல ஒலித்தால் நாகத்திற்கு என்ன ஏதம் வரும்? நாகம் உயிர்ப்பக் கெடும் - அந்நாகம் உயிர்த்த துணையானே அது தானே கெடும். (உவமைச்சொல் தொக்கு நின்றது. இத்தொழில் உவமத்தால் திரட்சி பெற்றாம். வீரரல்லாதார் பலர் திரண்டு ஆர்த்தால் அதற்கு வீரன் அஞ்சான்: அவன் கிளர்ந்த துணையானே அவர்தாம் கெடுவர் என்பது தோன்ற நின்றமையின், இது பிறிது மொழிதல் என்னும் அலங்காரம். வீரரல்லாதார் பலரினும் வீரனொருவனை ஆள்தல் நன்று என்பதாம். இவை மூன்று பாட்டானும் முறையே அரசனுக்குப் படை ஏனையங்கங்களுள் சிறந்தது என்பதூஉம், அதுதன்னுள்ளும் மூலப்படை சிறந்தது என்பதூஉம் அது தன்னுள்ளும் வீரன் சிறந்தான் என்பதூஉம் கூறப்பட்டன.)
சாலமன் பாப்பையா
பாம்பென நிற்கும் சிறுபடை முன் கடல் என வீரர்கள் திரண்டிருந்தாலும், திரண்டவர்கள் மனத்தால் எலியாக இருந்தால் என்ன ஆகும்? பாம்பு மூச்சு விட்ட அளவிலேயே எலிப்படை அத்தனையும் அழியும்.
Meaning in English
Though, like the sea, the angry mice send forth their battle cry; What then? The dragon breathes upon them, and they die