உயர்வகலம் திண்மை அருமைஇந் நான்கின்அமைவரண் என்றுரைக்கும் நூல்.
uyarvakalan tiNmai arumaiyin nAnkinamaivaraN enRuraikkum nUl
Varshan
பொருள் / உரை
முருகா எளிய உரை
பகைவர் ஏற முடியாத உயரம், வீரர்கள் நின்று போரிடத்தக்க அகலம், ஆயுதங்களால் தகர்க்க முடியாத உறுதி, பகைவர் எளிதில் நெருங்க முடியாத அருமை ஆகிய நான்கு அமைப்புகளும் நிறைந்த மதிலையே சிறந்த அரண் என்று நூல்கள் கூறும்.
• உயர்வு அகலம் திண்மை அருமை = ஏற முடியாத உயரம், வீரர்கள் இயங்கும் அகலம், இடிக்க முடியாத உறுதி, அணுக முடியாத அருமை,• இந்நான்கின் அமைவு அரண் என்றுரைக்கும் நூல் = ஆகிய நான்கும் பொருந்திய மதிலையே சிறந்த அரண் என்று நூல்கள் கூறும்.
மு.வரதராசன்
உயரம், அகலம், உறுதி, பகைவரால் அழிக்க முடியாத அருமை ஆகிய இந்த நான்கும் அமைந்திப்பதே அரண் என்று நூலோர் கூறுவர்.
பரிமேலழகர்
உயர்வு, அகலம், திண்மை, அருமை இந்நான்கின் அமைவு - உயர்ச்சியும், அகலமும், திண்மையும், அருமையும் என்று சொல்லப்பட்ட இந்நான்கின் மிகுதியையுடைய மதிலை; அரண் என்று உரைக்கும் நூல் - அரண் என்று சொல்லுவர் நூலோர். (அமைவு, நூல் என்பன ஆகுபெயர். உயர்வு - ஏணியெய்தாதது. அகலம் - புறத்தோர்க்கு அகழலாகா அடியகலமும், அகத்தோர்க்கு நின்று வினை செய்யலாம் தலையகலமும். திண்மை - கல் இட்டிகைகளாற் செய்தலின் குத்தப்படாமை. அருமை - பொறிகளான் அணுகுதற்கு அருமை. பொறிகளாவன, 'வளைவிற் பொறியும் அடியிற்செறி நிலையும் கருவிர லூகமும் கல்லுமிழ் கவணும், பரிவுறு வெந்நெயும் பாகடு குழிசியும், காய்பொன் உலையும் கல்லிடு கூடையும் தூண்டிலும் துடக்கும் ஆண்டலை யடுப்பும் கவையும் கழுவும் புதையும் புழையும் ஐயவித் துலாமும் கைபெய ரூசியும் சென்றெறி சிரலும், பன்றியும் பணையும் எழுவும் சீப்பும் உழுவிறற் கணையமும் கோலும் குந்தமும் வேலும் சூலமும்' ( சிலப., அடைக் 207-216) என்றிவை முதலாயின)
சாலமன் பாப்பையா
பகைவர் ஏற முடியாத உயரம், காவலர் நிற்க இயங்க வசதியான அகலம், இடிக்கமுடியாத வலிமை, கடக்க முடியாத பொறிகளின் அருமை, இந்நான்கையும் மிகுதியாக உடைய கோட்டையையே செயற்கை அரண் என்று நூல்கள் கூறும்.
Meaning in English
Height, breadth, strength, difficult access: Science declares a fort must these possess