திருவள்ளுவர் அருளிய
திருக்குறள் 662

முருகா எளிய உரை

சொல் பொருள் (பதவுரை):• ஊறொரால் = கேடு தரும் செயல்களை முன்கூட்டியே தவிர்ப்பது,• உற்றபின் ஒல்காமை = இடையூறுகள் வந்தாலும் மனம் தளராமல் இருப்பது,• இவ்விரண்டின் ஆறென்பர் ஆய்ந்தவர் கோள் = இவ்விரண்டையுமே சான்றோர்களின் செயல்நெறி என்பர்.எளிய விளக்கம்:கேடு தரும் தவறான செயல்களை முன்கூட்டியே தவிர்ப்பது, நல்ல காரியத்தில் இடையூறுகள் நேர்ந்தாலும் மனம் தளராமல் இருப்பது ஆகிய இந்த இரண்டு வழிகளுமே நீதிநூல்களை ஆராய்ந்த சான்றோர்களின் சிறந்த கொள்கையாகும்.

மு.வரதராசன்

இடையூறு வருவதற்கு முன்பே நீக்குதல், வந்த பின் தளராமை ஆகிய இந்த இரண்டினது வழியே வினைத்திட்பம் பற்றி ஆராய்ந்தவரின் கொள்கையாம்.

பரிமேலழகர்

ஆய்ந்தவர் கோள் - முன் நீதிநூல் ஆராய்ந்த அமைச்சரது துணிபு; ஊறு ஒரால் உற்றபின் ஒல்காமை இவ்விரண்டன் ஆறு என்பர் - பழுதுபடும் வினைகளைச் செய்யாமையும், செய்யும் வினை தெய்வத்தான் பழுதுபட்ட வழி அதற்குத் தளராமையும் ஆகிய இவ்விரண்டன் வழி என்பர் நூலோர். (தேவர்க்கும் அசுரர்க்கும் அமைச்சுப் பூண்ட வியாழ, வெள்ளிகளது துணிபு தொகுத்துப் பின் நீதிநூலுடையார் கூறியவாறு கூறுகின்றமையின், ஈண்டு வினைத்தூய்மையும் உடன் கூறினார். உறுதலுடையதனை முன் 'ஊறு' என்றமையின், 'உற்றபின்' என்றும்,இவ் இரண்டன் கண்ணே பட்டது என்பார் 'இரண்டன் ஆறு' என்றும் கூறினார். 'ஊறு ஒரார்' என்று பாடம் ஓதுவாரும் உளர், அஃது 'ஒல்காமை' என்னும் எண்ணோடும், 'இரண்டு' என்னும் தொகையோடும் இயையாமை அவர் அறிந்திலர்.)

சாலமன் பாப்பையா

பழுதுபடும் செயல்களைச் செய்யாது இருப்பது, பழுதுபட்டாலும் மனம் தளராமல் இருப்பது இவ்விரண்டும் நீதிநூல் பல ஆய்ந்தவர்களின் கோட்பாடு என்று கூறுவர்.