ஞாலம் கருதினுங் கைகூடுங் காலம்கருதி இடத்தாற் செயின்.
njAlang karutinung kaikUTung kAlamkaruti iTattAR seyin
Kovai Murali
பொருள் / உரை
முருகா எளிய உரை
செயலைச் செய்து முடிப்பதற்குரிய சரியான காலத்தையும், அதற்குப் பொருத்தமான இடத்தையும் நன்கு தேர்ந்து செயல்பட்டால், உலகத்தையே ஆள ஒருவன் விரும்பினாலும் அது அவனுக்கு வசப்பட்டு வெற்றியாகும்.
• காலம் கருதி = ஒரு செயலைத் தொடங்குவதற்குரிய சரியான சாதகமான காலத்தை ஆராய்ந்து,• இடத்தால் செயின் = அதற்குப் பொருத்தமான நில அமைப்பையும் இடத்தையும் தேர்ந்தெடுத்துச் செயல்பட்டால்,• ஞாலம் கருதினும் = இந்த உலகத்தையே ஆள ஒருவன் விரும்பினாலும் கூட,• கைகூடும் = அந்த மாபெரும் சாதனையும் அவனுக்கு எளிதில் வசப்பட்டு வெற்றியடையும்.
மு.வரதராசன்
(செயலை முடிப்பதற்கு ஏற்ற) காலத்தை அறிந்து இடத்தோடு பொருந்துமாறு செய்தால், உலகமே வேண்டும் எனக் கருதினாலும் கைகூடும்.
பரிமேலழகர்
ஞாலம் கருதினும் கைகூடும் - ஒருவன் ஞாலம் முழுவதும் தானே ஆளக் கருதினானாயினும் அஃது அவன் கையகத்ததாம், காலம் கருதி இடத்தான் செயின் - அதற்குச் செய்யும் வினையைக் காலம் அறிந்து இடத்தோடு பொருந்தச் செய்வானாயின். ('இடத்தான்' என்பதற்கு மேல் 'கருவியான்' என்பதற்கு உரைத்தாங்கு உரைக்க, கைகூடாதனவும் கைகூடும் என்பதாம். இவை மூன்று பாட்டானும் காலம் அறிதற் பயன் கூறப்பட்டது.)
சாலமன் பாப்பையா
ஏற்ற காலத்தையும் இடத்தையும் அறிந்து ஒரு செயலைச் செய்தால், பூவுலகம் முழுமையையும் வேண்டினாலும் அது கைவசப்படும்.
Meaning in English
The pendant world's dominion may be won, In fitting time and place by action done