நுனிக்கொம்பர் ஏறினார் அஃதிறந் தூக்கின்உயிர்க்கிறுதி ஆகி விடும்.
nunikkompar ERinAr aஃtiRan tUkkinuyirkkiRuti Aki viTum
Jessica Judes
பொருள் / உரை
முருகா எளிய உரை
மரத்தின் நுனிக் கிளை வரை ஏறியவன், தன் எல்லை கடந்து மேலும் தாவ முயன்றால் கீழே விழுந்து உயிருக்கே ஆபத்தாய் முடியும். அதுபோலவே, தன் ஆற்றலின் எல்லையை உணராமல் வரம்பு மீறிச் செயல்படும் ஒருவனுக்கு அதுவே முழு அழிவைத் தரும்.
• நுனிக் கொம்பர் ஏறினார் = உயரமான மரக்கிளையின் மிக மெல்லிய நுனிப்பகுதி வரை ஏறி நின்ற ஒருவர்,• அஃது இறந்து = அந்தப் பாதுகாப்பான எல்லையையும் கடந்து,• ஊக்கின் = அளவுக்கு மீறிய துணிச்சலோடு மேலே எகிறித் தாவ முயன்றால்,• உயிர்க்கு இறுதி ஆகிவிடும் = அது கிளை முறிந்து கீழே விழுந்து அவரது உயிருக்கே முடிவாய் முடியும்.
மு.வரதராசன்
ஒரு மரத்தின் நுனிக்கொம்பில் ஏறியவர், அதையும் கடந்து மேலே ஏற முனைந்தால், அவருடைய உயிர்க்கு முடிவாக நேர்ந்துவிடும்.
பரிமேலழகர்
கொம்பர் நுனி ஏறினார் அஃது இறந்து ஊக்கின் - ஒருமரக்கோட்டினது நுனிக்கண்ணே ஏறி நின்றார், தம் ஊக்கத்தால் அவ்வளவினகை கடந்து மேலும் ஏற ஊக்குவாராயின்; உயிர்க்கு இறுதி ஆகிவிடும் - அவ்வூக்கம் அவர் உயிர்க்கு இறுதியாய் முடியும். ('நுனிக்கொம்பர்' என்பது கடைக்கண் என்பதுபோலப் பின் முன்னாகத் தொக்க ஆறாம் வேற்றுமைத்தொகை. பன்மை அறிவின்மைபற்றி இழித்தற்கண் வந்தது. இறுதிக்கு ஏது ஆவதனை 'இறுதி' என்றார். 'பகைமேற் செல்வான் தொடங்கித் தன்னால் செல்லலாமளவும் சென்று நின்றான், பின் அவ்வளவின் நில்லாது மன எழுச்சியான் மேலும் செல்லுமாயின், அவ்வெழுச்சி வினை முடிவிற்கு ஏதுவாகாது அவனுயிர் முடிவிற்கு ஏதுவாம்' என்னும் பொருள்தோன்ற நின்றமையின் , இதுவும் மேலை அலங்காரம். 'அளவு அறிந்து நிற்றல் வேண்டும்' என்றமையின் இதனான் வினைவலி அறியாவழிப்படும் இழுக்குக் கூறப்பட்டது.)
சாலமன் பாப்பையா
ஒரு மரக்கிளையின் நுனியில் ஏறிவிட்டவர், அந்த அளவையும் கடந்து மேலும் ஏற முயன்றால், அம் முயற்சியே அவர் உயிருக்கு முடிவாகிவிடும்.
Meaning in English
Who daring climbs, and would himself upraise Beyond the branch's tip, with life the forfeit pays