உற்றநோய் நீக்கி உறாஅமை முற்காக்கும்பெற்றியார்ப் பேணிக் கொளல்.
uRRanOy nIkki uRAamai muRkAkkumpeRRiyArp pENik koLal
Spoorthi Rao
பொருள் / உரை
முருகா எளிய உரை
தற்போது வந்துள்ள துன்பங்களைப் போக்கும் வழியறிந்து போக்கி, எதிர்காலத்தில் அத்துன்பங்கள் மீண்டும் வராதவாறு முன்கூட்டியே தடுத்துக் காக்கவல்ல ஆற்றல் மிக்க பெரியோர்களைப் போற்றித் துணையாகக் கொள்ள வேண்டும்.
• உற்ற நோய் நீக்கி = தற்போது வந்துள்ள கடுமையான துன்பங்களையும் சிக்கல்களையும் ஆராய்ந்து நீக்கி,• உறாஅமை = இனிமேலும் அத்தகைய துன்பங்கள் ஒருபோதும் நேராதவாறு,• முற்காக்கும் = முன்னதாகவே விழிப்புடன் தடுத்துக் காக்கவல்ல• பெற்றியாரை = சிறந்த ஆற்றலும் அறிவும் உடைய பெரியோர்களை,• பேணிக் கொளல் = போற்றிப் பாராட்டி அவர்களுக்கு விருப்பமானவற்றைச் செய்து துணையாக ஏற்றுப் பக்கபலமாக வைத்துக் கொள்ள வேண்டும்.
மு.வரதராசன்
வந்துள்ள துன்பத்தை நீக்கி, இனித் துன்பம் வராதபடி முன்னதாகவே காக்கவல்ல தன்மையுடையவரைப் போற்றி நட்புக் கொள்ள வேண்டும்.
பரிமேலழகர்
உற்ற நோய் நீக்கி - தெய்வத்தானாக மக்களானாகத் தனக்கு வந்த துன்பங்களை நீக்குமாறு அறிந்து நீக்கி ; உறாமை முற்காக்கும் பெற்றியார் - பின் அப்பெற்றியன வாராவண்ணம் முன் அறிந்து காக்கவல்ல தன்மையினையுடையாரை; பேணிக்கொளல் - அரசன் அவர் உவப்பன செய்து துணையாகக் கொள்க. (தெய்வத்தான் வரும் துன்பங்களாவன: மழையினது இன்மை மிகுதிகளானும், காற்று தீ, பிணி என்ற இவற்றானும் வருவன. அவை கடவுளரையும் தக்கோரையும் நோக்கிச் செய்யும் சாந்திகளான் நீக்கப்படும். மக்களான் வரும் துன்பங்களாவன: பகைவர், கள்வர், கற்றறிந்தார், வினை செய்வார் என்றிவர்களான் வருவன. அவை சாம பேத தான தண்டங்கள் ஆகிய நால்வகை உபாயத்துள் ஏற்றதனால் நீக்கப்படும். முற்காத்தலாவது: தெய்வத்தான் வருவனவற்றை உற்பாதங்களால் அறிந்து அச்சாந்திகளால் காத்தலும், மக்களான் வருவனவற்றை அவர் குணம், இங்கிதம், ஆகாரம், செயல் என்பனவற்றுள் அறிந்து, அவ்வுபாயங்களுள் ஒன்றால் காத்தலும் ஆம் ; ஆகவே புரோகிதரையும் அமைச்சரையும் கூறியவாறாயிற்று. இங்கிதம் - குறிப்பால் நிகழும் உறுப்பின் தொழில். ஆகாரம் - குறிப்பின்றி நிகழும் வேறுபாடு. உவப்பன - நன்கு மதித்தல் முதலியன. இவை இரண்டு பாட்டானும் பெரியாரது இலக்கணமும்,அவரைத் துணையாகக் கோடல் வேண்டும் என்பதூஉம்,கொள்ளுமாறும் கூறப்பட்டன.)
சாலமன் பாப்பையா
வந்த துன்பங்களைப் போக்கும் வழி அறிந்து போக்கி, அவை திரும்பவும் வராமல் முன்னதாகவே காக்கும் ஆற்றல் மிக்கவரை, அவருக்கு வேண்டியதைச் செய்து, துணையாகப் பெறுக.
Meaning in English
Cherish the all-accomplished men as friends, Whose skill the present ill removes, from coming ill defends