வருமுன்னர்க் காவாதான் வாழ்க்கை எரிமுன்னர்வைத்தூறு போலக் கெடும்.
varumunnark kAvAtAn vAzhkkai erimunnarvaittURu pOlak keTum
Priyanka NK
பொருள் / உரை
முருகா எளிய உரை
குற்றங்களும் பேராபத்துகளும் வருவதற்கு முன்பே எச்சரிக்கையோடு தடுத்துத் தன்னைக் காத்துக் கொள்ளாதவனுடைய வாழ்க்கை, எரிகின்ற நெருப்பின் முன் வைக்கப்பட்ட வைக்கோல் போர் போல நொடியில் சாம்பலாகி அழிந்துவிடும்.
• வருமுன்னர் = தனக்குக் குற்றங்களும் அழிவுகளும் வந்து சேர்வதற்கு முன்பாகவே எச்சரிக்கையோடு,• காவாதான் வாழ்க்கை = வராமல் தடுத்துத் தன்னைக் காத்துக் கொள்ளாதவனுடைய வாழ்க்கையானது,• எரி முன்னர் = கொழுந்துவிட்டு எரியும் பெரும் நெருப்பின் முன்னால் வைக்கப்பட்ட• வைத்தூறு போல = உலர்ந்த வைக்கோல் போரைப் போல• கெடும் = அடுத்த நொடியிலேயே சுக்குநூறாக எரிந்து சாம்பலாகி அழியும்.
மு.வரதராசன்
குற்றம் நேர்வதற்கு முன்னமே வராமல் காத்துக் கொள்ளாதவனுடைய வாழ்க்கை, நெருப்பின் முன் நின்ற வைக்கோல் போர் போல் அழிந்துவிடும்.
பரிமேலழகர்
வருமுன்னர்க் காவாதான் வாழ்க்கை - குற்றம் வரக்கடவதாகின்ற முற்காலத்திலே அதனைக் காவாத அரசன் வாழ்க்கை, எரி முன்னர் வைத்தூறு போலக் கெடும் - அது வந்தால் எரிமுகத்து நின்ற வைக்குவை போல அழிந்து விடும். ('குற்றம்' என்பது அதிகாரத்தான் வந்தது. முன்னர் என்றதன் ஈற்றது பகுதிப்பொருள் விகுதி, 'வரும்' என்னும் பெயரெச்சம் 'முன்னர்' என்னும் காலப்பெயர் கொண்டது; அதனால் காக்கலாம் காலம் பெறப்பட்டது. குற்றம் சிறிதாயினும், அதனால் பெரிய செல்வம் அழிந்தே விடும் என்பது உவமையால் பெற்றாம்.)
சாலமன் பாப்பையா
தனக்கு ஒரு குற்றம் வருவதற்கு முன்பே வராமல் காத்துக் கொள்ளாத அரசு, நெருப்பிற்கு முன் வைக்கப்பட்ட வைக்கோல் போல அழிந்துபோகும்.
Meaning in English
His joy who guards not 'gainst the coming evil day, Like straw before the fire shall swift consume away