தூங்காமை கல்வி துணிவுடைமை இம்மூன்றும்நீங்கா நிலனான் பவர்க்கு.
tUngkAmai kalvi tuNivuTaimai ammUnRumnIngkA nilanAL pavaRku
Sophia Joseph
பொருள் / உரை
முருகா எளிய உரை
நாட்டை ஆளுகின்ற சிறந்த தலைவர்களுக்குக் காலம் தாழ்த்தாமல் விரைந்து செயல்படும் விழிப்புணர்வு, சிறந்த கல்வி அறிவு, துணிச்சலான முடிவெடுக்கும் திறன் ஆகிய மூன்று பண்புகளும் ஒருபோதும் விலகாமல் நிலைத்திருக்க வேண்டும்.
• நிலன் ஆள்பவர்க்கு = நாட்டை ஆளும் சிறந்த தலைவர்களுக்கு,• தூங்காமை = முடிவுகளையும் காரியங்களையும் காலம் தாழ்த்தாமல் உடனே செய்யும் விழிப்புணர்வும்,• கல்வி = ஆளுகைக்குத் தேவையான நீதி நூல்களைக் கற்ற கல்வியும்,• துணிவு உடைமை = தயங்காமல் நன்மையைச் செயல்படுத்தும் மனத்துணிவும்• இம்மூன்றும் நீங்கா = ஆகிய இந்த மூன்று பண்புகளும் ஒருபோதும் அவர்களை விட்டு நீங்காமல் நிலைத்திருக்க வேண்டும்.
மு.வரதராசன்
காலம் தாழ்த்தாத தன்மை, கல்வியுடைமை, துணிவுடைமை இந்த மூன்று பண்புகளும் நிலத்தை ஆளும் அரசனுக்கு நீங்காமல் இருக்க வேண்டியவை.
பரிமேலழகர்
நிலன் ஆள்பவற்கு - நிலத்தினை ஆளும் திருவுடையாற்கு; தூங்காமை கல்வி துணிவு உடைமை இம்மூன்றும் நீங்கா - அக்காரியங்களில் விரைவுடைமையும், அவை அறிதற்கு ஏற்ற கல்வியுடமையும், ஆண்மை உடைமையும் ஆகிய இம்மூன்று குணமும் ஒருகாலும் நீங்கா. (கல்வியது கூறுபாடு முன்னர்க் கூறப்படும். ஆண்மையாவது, ஒன்றனையும் பாராது கடிதில் செய்வது ஆகலின்,அஃது ஈண்டு உபசார வழக்கால் 'துணிவு' எனப்பட்டது. உம்மை இறந்தது தழீஇய எச்ச உம்மை. இவற்றுள் கல்வி ஆறு அங்கத்திற்கும் உரித்து. ஏனைய வினைக்கு உரிய. 'நீங்கா' என்பதற்குமேல் எஞ்சாமைக்கு உரைத்தாங்கு உரைக்க)
சாலமன் பாப்பையா
செயல் ஆற்றுவதில் சோர்வு இல்லாமை, அனைத்தையும் அறியும் கல்வி, தீயவை எதிர்த்தாலும் நல்லன செய்வதற்கு ஏற்ற துணிவு இம்மூன்றும் நாட்டை ஆளுவோரை விட்டு விலகக்கூடாது.
Meaning in English
A sleepless promptitude, knowledge, decision strong: These three for aye to rulers of the land belong