அறனிழுக்கா தல்லவை நீக்கி மறனிழுக்காமானம் உடைய தரசு.
aRanizhukkA tallavai nIkki maRanizhukkAmAna muTaiya tarasu
Bhavna Ravichandran
பொருள் / உரை
முருகா எளிய உரை
தனக்குரிய அறநெறியிலிருந்து தவறாமலும், நாட்டில் அநீதிகளையும் குற்றங்களையும் வேரறுத்தலும், வீரத்திலும் தர்மத்திலும் குறைவில்லாத உயர்ந்த மானத்தோடு திகழ்தலுமே ஒரு சிறந்த அரசுக்குரிய இலக்கணமாகும்.
• அறன் இழுக்காது = தனக்குரிய ஆட்சி அறநெறியிலிருந்து சிறிதும் பிறழாமல் நின்று,• அல்லவை நீக்கி = தன் நாட்டில் அநீதிகளும் கொடுமைகளும் நிகழாதவாறு அவற்றை அழித்து ஒழித்து,• மறன் இழுக்கா = போர்க்கள வீரத்திலும் தர்மநெறியிலும் குறைவுபடாத• மானம் உடையது அரசு = உயர்ந்த மானமும் சுயமரியாதையும் கொண்ட ஆட்சியே சிறந்த அரசாகும்.
மு.வரதராசன்
ஆட்சி முறைக்கு உரிய அறத்தில் தவறாமல் அறமல்லாதவற்றை நீக்கி வீரத்தில் குறைபடாத மானத்தை உடையவனே சிறந்த அரசன் ஆவான்.
பரிமேலழகர்
அறன் இழுக்காது - தனக்கு ஒதிய அறத்தின் வழுவாது ஒழுகி, அல்லவை நீக்கி - அறனவல்லவை தன் நாட்டின் கண்ணும் நிகழாமல் கடிந்து, மறன் இழுக்கா மானம் உடையது அரசு - வீரத்தின் வழுவாத தாழ்வு இன்மையினை உடையான் அரசன். (அவ்வறமாவது , ஓதல், வேட்டல், ஈதல் என்னும் பொதுத்தொழிலினும், படைக்கலம் பயிறல், பல் உயிரோம்பல், பகைத்திறம் தெறுதல் என்னும் சிறப்புத்தொழிலினும் வழுவாது நிற்றல். மாண்ட, 'அறநெறி முதற்றே அரசின் கொற்றம்' (புறநா. 55) - என்பதனால், இவ்வறம் பொருட்குக் காரணமாதல் அறிக. அல்லவை, கொலை , களவு முதலாயின. குற்றமாய மானத்தின் நீக்குதற்கு, 'மறன் இழுக்கா மானம்' என்றார். அஃதாவது, 'வீறின்மையின் விலங்காம் என மதவேழமும் எறியான் - ஏறுண்டவர் நிகராயினும் பிறர் மிச்சில் என்று எறியான் - மாறன்மையின் மறம்வாடும் என்று இளையாரையும் எறியான் - ஆறன்மையின் முதியாரையும் எறியான் அயில் உழவன் (சீவக. மண்மக.159) எனவும் , அழியுநர் புறக்கொடை அயில்வேல் ஓச்சான்'.(பு.வெ. வஞ்சி. 20) எனவும் சொல்லப்படுவது. அரசு: அரசனது தன்மை : அஃது உபசார வழக்கால் அவன்றன்மேல் நின்றது.)
சாலமன் பாப்பையா
தனக்குச் சொல்லப்பட்ட அறத்திலிருந்து விலகாமல், அறமற்ற கொடுமைகள் தன் நாட்டில் நடைபெறாமல் விலக்கி, வீரத்தில் தவறாமல் நின்று மானத்தைப் பெரிதாக மதிப்பதே அரசு.
Meaning in English
Kingship, in virtue failing not, all vice restrains, In courage failing not, it honour's grace maintains