ஆரா இயற்கை அவாநீப்பின் அந்நிலையேபேரா இயற்கை தரும்.
ArA iyaRkai avAnIppin annilaiyEpErA iyaRkai tarum
Rahul Vellal
பொருள் / உரை
முருகா எளிய உரை
எவ்வளவு கிடைத்தாலும் ஒருபோதும் திருப்தியடையாத இயல்புடைய பேராசையை ஒருவன் தன் உள்ளத்திலிருந்து ஒழித்துவிட்டால், அந்த ஆசையற்ற மனநிலையே அவனுக்கு அந்த நொடியிலேயே எக்காலத்தும் மாறாத நிலையான முக்திப் பேரின்ப நிலையைத் தரும்.
• ஆரா இயற்கை அவா = எவ்வளவு கிடைத்தாலும் ஒருபோதும் திருப்தியடையாத இயல்பு கொண்ட அடங்காத பேராசையை• நீப்பின் = ஒருவன் தன் உள்ளத்திலிருந்து முழுமையாக ஒழித்துவிட்டால்,• அந்நிலையே = அந்த ஆசையற்ற நிலையே அவனுக்கு அந்த கணத்திலேயே• பேரா இயற்கை தரும் = எக்காலத்தும் மாறாத நிலையான முக்திப் பேரின்ப நிலையை (ஜீவன் முக்தி நிலையை) வழங்கும்.
மு.வரதராசன்
ஒருபோதும் நிரம்பாத தன்மை உடைய அவாவை ஒழித்தால் ஒழித்த அந்நிலையே எப்போதும் மாறாதிருக்கும் இன்ப வாழ்வைத் தரும்.
பரிமேலழகர்
ஆரா இயற்கை அவா நீப்பின் - ஒருகாலும் நிரம்பாத இயல்பினையுடைய அவாவினை ஒருவன் நீக்குமாயின், அந்நிலையே பேரா இயற்கை தரும் - அந்நீப்பு அவனுக்கு அப்பொழுதே எஞ்ஞான்றும் ஒரு நிலைமையனாம் இயல்பைக் கொடுக்கும். (நிரம்பாமையாவது: தாமேயன்றித் தம்பயனும் நிலையாமையின் வேண்டாதனவாய பொருள்களை வேண்டி மேன் மேல் வளர்தல். அவ்வளர்ச்சிக்கு அளவின்மையின், நீத்தலே தக்கது என்பது கருத்து. களிப்புக்கு கவற்சிகளும் பிறப்புப் பிணிமூப்பு இறப்புக்களும் முதலாயின இன்றி, உயிர் நிரதிசய இன்பத்தாய் நிற்றலின் வீட்டினை 'பேரா இயற்கை' என்றும், அஃது அவாநீத்த வழிப்பெறுதல் ஒரு தலையாகலின், 'அந்நிலையே தரும்' என்றும் கூறினார். ஒன்றாய்க் கிடந்த அரும்பெரும்பாழ் உலப்பிலதனை உணர்ந்துணர்ந்து, சென்றாங்கு இன்பத்துன்பங்கள் செற்றுக்களைந்து பசையற்றால், அன்றே அப்போதே வீடும் அதுவே வீடு வீடாமே. (திருவாய் 78-6)என்பதும் இக்கருத்தே பற்றி வந்தது. இந்நிலைமை உடையவனை வடநூலார் 'சீவன் முத்தன்' என்ப. இதனால் வீடாவது இது என்பதூஉம், அஃது அவா அறுத்தார்க்கு அப்பொழுதே உளதாம் என்பதூஉம் கூறப்பட்டன.)
சாலமன் பாப்பையா
ஒரு காலமும் முடிவு பெறாத குணத்தை உடைய ஆசையை விட்டுவிட்டால், அதுவே ஒருவனுக்கு நிலைத்து வாழும் இயல்பைக் கொடுக்கும்.
Meaning in English
Drive from thy soul desire insatiate; Straight'way is gained the moveless blissful state