சார்புணர்ந்து சார்பு கெடஒழுகின் மற்றழித்துச்சார்தரா சார்தரு நோய்.
sArpuNarntu sArpu keTavozhukin maRRazhittussArtarA sArtaru nOy
Sathyan Ilanko
பொருள் / உரை
முருகா எளிய உரை
அனைத்திற்கும் மூல ஆதாரமான பரம்பொருளை உணர்ந்து, உலகப் பற்றுகள் அழியுமாறு மெய்ஞான ஒழுக்கத்தோடு வாழ்ந்தால், பழவினைகளால் வரக்கூடிய பிறவித் துன்பங்கள் அனைத்தும் அடியோடு அழிந்துபோய், அவனை ஒருபோதும் வந்து தீண்டாது.
• சார்பு உணர்ந்து = எல்லாப் பொருட்களுக்கும் அடைக்கல ஆதாரமாகிய பரம்பொருளை உணர்ந்து,• சார்பு கெட ஒழுகின் = உலகப் பொருட்களின் மீதான பற்றுக்கள் அழியுமாறு யோக நெறியில் வாழ்ந்தால்,• சார்தரு நோய் = வினைகளால் அவனை வந்து அடையக் காத்திருக்கும் பிறவித் துன்பங்கள் அனைத்தும்• மற்று அழித்து = அந்த ஞான ஒழுக்கத்தால் அடியோடு அழிக்கப்பட்டு,• சார்தரா = அவனை ஒருபோதும் மீண்டும் வந்து தீண்டாது.
மு.வரதராசன்
எல்லாப் பொருளுக்கும் சார்பான செம்பொருளை உணர்ந்து பற்றுக் கெடுமாறு ஒழுகினால், சார்வதற்க்கு உரிய துன்பங்கள் திரும்ப வந்து அடையா.
பரிமேலழகர்
சார்பு உணர்ந்து சார்புகெட ஒழுகின் - ஒருவன் எல்லாப் பொருட்கும் சார்பாய அச்செம்பொருளை உணர்ந்து, இருவகைப் பற்றும் அற ஒழுகவல்லனாயின்; சார்தரும் நோய் அழித்து மற்றுச் சார்தரா - அவனை முன் சாரக்கடவனவாய் நின்ற துன்பங்கள் அவ்வுணர்வு ஒழுக்கங்களை அழித்துப் பின் சாரமாட்டா. (ஆகு பெயரால் சாரும் இடத்தையும் சார்வனவற்றையும் 'சார்பு' என்றார். 'ஈண்டு'ஒழுக்கம் என்றது யோகநெறி யொழுகுதலை.அஃது இயமம், நியமம், இருப்பு, உயிர் நிலை, மன ஒடுக்கம், தாரணை, தியானம், சமாதி என எண்வகைப்படும். அவற்றின் பரப்பெல்லாம் ஈண்டுஉரைப்பின் பெருகும். யோக நூல்களுள் காண்க. 'மற்றுச் சார்தரா' என இயையும். சாரக்கடவனவாய் நின்ற துன்பங்களாவன: பிறப்பு அநாதியாய் வருதலின் உயிரான் அளவின்றி ஈட்டப்பட்ட வினைகளின் பயன்களுள்இறந்த உடம்புகளான் அனுபவித்தனவும் 'பிறந்த உடம்பான்முகந்து நின்றனவும் ஒழியப் பின்னும் அனுபவிக்கக்கடவனவாய்க் கிடந்தன. அவை விளக்கின் முன் இருள்போல ஞானயோகங்களின் முன்னர்க் கெடுதலான், 'அழித்துச்சார்தரா' என்றார். இதனை ஆருகதர் 'உவர்ப்பு' என்ப. பிறப்பிற்குக் காரணம் ஆகலான்' நல்வினைப் பயனும் 'நோய்'எனப்பட்டது. மேல் மூன்று உபாயத்தானும் பரம்பொருளைஉணரப் பிறப்பு அறும் என்றார். அஃது அறும்வழிக் கிடந்ததுன்பங்கள் எல்லாம் என் செய்யும் என்னும் கடாவைஆசங்கித்து. அவை ஞான யோகங்களின் முதிர்ச்சி உடையஉயிரைச் சாரமாட்டாமையானும், வேறு சார்பு இன்மையானும் 'கெட்டு விடும்'என்பது இதனால் கூறப்பட்டது.)
சாலமன் பாப்பையா
எல்லாப் பொருள்களுக்கும் இடமாகிய மெய்ப்பொருளை உணர்ந்து பற்றின்றி வாழ்ந்தால், பற்ற வரும் துன்பங்கள் ஒழுக்க உணர்வை அழி்த்துப் பற்ற மாட்டா.
Meaning in English
The true 'support' who knows- rejects 'supports' he sought before- Sorrow that clings all destroys, shall cling to him no more