பற்றற்ற கண்ணே பிறப்பறுக்கும் மற்றுநிலையாமை காணப் படும்.
paRRaRRa kaNNE piRappaRukkum maRRunilaiyAmai kANap paTum
Thenuga Sivanesarajah
பொருள் / உரை
முருகா எளிய உரை
இருவகைப் பற்றுகளும் உள்ளத்திலிருந்து முழுமையாக நீங்கிய அந்த கணத்திலேயே பிறவித் தளை அறுபட்டு முக்தி உண்டாகும்; அவ்வாறு பற்றுகள் நீங்காத போது, மீண்டும் மீண்டும் பிறந்து இறக்கும் நிலையற்ற துன்பச் சுழற்சியே தொடரும்.
• பற்று அற்ற கண்ணே = அகப்பற்று, புறப்பற்று ஆகிய இருவகைப் பற்றுகளும் உள்ளத்திலிருந்து அடியோடு நீங்கிய அப்பொழுதே,• பிறப்பு அறுக்கும் = அது மனிதனின் பிறவித் துன்பச் சுழற்சியை வேரறுத்து முக்தி அளிக்கும்;• மற்று = அவ்வாறு பற்றுக்கள் நீங்காத போது,• நிலையாமை காணப்படும் = மீண்டும் மீண்டும் பிறந்து இறந்து உழலும் நிலையற்ற துன்பமே ஒருவனிடம் தொடரும்.
மு.வரதராசன்
இருவகைப் பற்றும் அற்றபொழுதே அந்நிலை பிறவித் துன்பத்தை ஒழிக்கும், இல்லையானால் (பிறவித்துன்பம் மாறி மாறி வந்து) நிலையாமைக் காணப்படும்.
பரிமேலழகர்
பற்று அற்ற கண்ணே பிறப்பு அறுக்கும் - ஒருவன் இருவகைப்பற்றும் அற்ற பொழுதே அப்பற்று அறுதி அவன் பிறப்பை அறுக்கும்; மற்று நிலையாமை காணப்படும் - அவை அறாதபொழுது அவற்றால் பிறந்து இறந்து வருகின்ற நிலையாமை காணப்படும். (காரணமாகிய பொழுதே காரியமும் அற்றதாம் முறைமைபற்றி, 'பற்றற்ற கண்ணே' என்றார்.' அற்றது பற்றெனில், உற்றது வீடு' (திருவாய் 1-2-5)என்பதூஉம் அது பற்றி வந்தது. இவை இரண்டு பாட்டானும்அவ்விருமையும் ஒருங்கு கூறப்பட்டன.)
சாலமன் பாப்பையா
ஆசைகளை முழுவதுமாக விட்டபோதுதான் பிறப்பு என்னும் கட்டு அறுபடும்; விடவில்லை என்றால், பிறப்பு மறுபடியும் தொடரும்.
Meaning in English
When that which clings falls off, severed is being's tie; All else will then be seen as instability