அறவினை யாதெனின் கொல்லாமை கோறல்பிறவினை எல்லாந் தரும்.
aRavinai yAtenin kollAmai kORalpiRavinai ellAn tarum
Divya Ramesh
பொருள் / உரை
முருகா எளிய உரை
அறங்கள் எல்லாவற்றிலும் தலையாய முதன்மையான செயல் ஓர் உயிரையும் கொல்லாமல் இருப்பதே ஆகும்; ஏனெனில் ஓர் உயிரைக் கொலை செய்யும் கொடிய பாவமானது மற்ற எல்லாத் தீவினைகளையும் பாவங்களையும் ஒருவனுக்குத் தானாகவே கொண்டுவந்து சேர்க்கும்.
• அறவினை யாது எனின் = அறங்கள் எல்லாவற்றிலும் தலையாய முதன்மை அறச்செயல் எதுவென்றால்,• கொல்லாமை = எந்தவொரு உயிரையும் கொல்லாமல் வாழும் 'அகிம்சை' நெறியாகும்;• கோறல் = ஓர் உயிரைக் கொலை செய்தலானது• பிற வினை எல்லாம் தரும் = மற்ற அனைத்துக் கொடிய பாவங்களையும் தீவினைகளையும் ஒருவனுக்குத் தானே கொண்டுவந்து சேர்க்கும்.
மு.வரதராசன்
அறமாகிய செயல் எது என்றால் ஒரு உயிரையும் கொல்லாமையாகும், கொல்லுதல் அறமல்லாத செயல்கள் எல்லாவற்றையும் விளைக்கும்.
பரிமேலழகர்
(அறவினை யாது எனின் கொல்லாமை - அறங்களெல்லாம் ஆகிய செய்கை யாது என்று வினவின், அஃது ஓர் உயிரையும் கொல்லாமையாம், கோறல் பிற வினை எல்லாம் தரும் - அவற்றைக் கொல்லுதல் பாவச்செய்கைகள் எல்லாவற்றையும் தானே தரும் ஆதலான். (அறம் - சாதியொருமை. விலக்கியது ஒழிதலும் அறஞ்செய்தலாம் ஆகலின், கொல்லாமையை அறவினை என்றார். ஈண்டுப் பிறவினை என்றது அவற்றின் விளைவை. கொலைப்பாவம் விளைக்கும் துன்பம் ஏனைப் பாவங்களெல்லாம் கூடியும் விளைக்க மாட்டா என்பதாம். கொல்லாமை தானே பிற அறங்கள் எல்லாவற்றின் பயனையும் தரும் என்று மேற்கோள் கூறி, அதற்கு ஏது எதிர்மறை முகத்தால் கூறியவாறாயிற்று.)
சாலமன் பாப்பையா
அறச்செயல் எது என்றால், பிற உயிர்களைக் கொலை செய்யாது இருப்பதே; கொல்வது அனைத்துப் பாவங்களையும் தரும்.
Meaning in English
What is the work of virtue? 'Not to kill'; For 'killing' leads to every work of ill