நகையும் உவகையும் கொல்லும் சினத்தின்பகையும் உளவோ பிற.
nakaiyum uvakaiyung kollunj sinattinpakaiyum uLavO piRa
Uma Maheswari
பொருள் / உரை
முருகா எளிய உரை
முகத்தில் தோன்றும் புன்னகையையும், உள்ளத்தில் மலரும் மகிழ்ச்சியையும் அடியோடு கொன்று அழிக்கும் சினத்தை விட, ஒரு மனிதனுக்குக் கொடிய கொடூரமான எதிரி இந்த உலகத்தில் வேறு எதுவுமே இல்லை.
• நகையும் = முகத்தின் இனிய புன்னகையையும்,• உவகையும் = உள்ளத்தின் ஆழ்ந்த மகிழ்ச்சியையும்• கொல்லும் = இரக்கமின்றி அழித்துக் கொல்லுகின்ற• சினத்தின் = சினத்தைக் காட்டிலும் கொடிய• பகையும் = ஒரு மனிதனுக்குத் தீங்கு செய்யும் கொடிய பகை• பிற உளவோ = உலகில் வேறு ஏதேனும் உண்டோ? (இல்லை).
மு.வரதராசன்
முகமலர்ச்சியும் அகமலர்ச்சியும் கொல்லுகின்ற சினத்தை விட ஒருவனுக்கு பகையானவை வேறு உள்ளனவோ?
பரிமேலழகர்
நகையும் உவகையும் கொல்லும் சினத்தின் - துறந்தார்க்கு அருளான் உளவாய முகத்தின்கண் நகையையும் மனத்தின் கண் உவகையையும் கொன்று கொண்டெழுகின்ற சினமே அல்லாது, பிற பகையும் உளவோ - அதனின் பிறவாய பகைகளும் உளவோ? இல்லை. (துறவால் புறப்பகை இலராயினும் உட்பகையாய் நின்று அருள் முதலிய நட்பினையும் பிரித்துப் பிறவித் துன்பமும் எய்துவித்தலான், அவர்க்குச் சினத்தின் மிக்க பகை இல்லை யாயிற்று. இவை மூன்று பாட்டானும் வெகுளியது தீங்கு கூறப்பட்டது.)
சாலமன் பாப்பையா
முகத்தில் சிரிப்பையும், மனத்துள் மகிழ்ச்சியையும் கொன்றுவிடும் கோபத்தை விட வேறு பகையும் உண்டோ?
Meaning in English
Wrath robs the face of smiles, the heart of joy, What other foe to man works such annoy