அளவல்ல செய்தாங்கே வீவர் களவல்லமற்றைய தேற்றா தவர்.
aLavalla seytAngkE vIvar kaLavallamaRRaiya tERRA tavar
Vishnuchandran G
பொருள் / உரை
முருகா எளிய உரை
களவைத் தவிர நேர்மையான வழிகளில் வாழத் தெரியாதவர்கள், வரம்பு மீறிய அநீதியான குற்றங்களைச் செய்து அந்த இழிசெயல்களாலேயே உடனடியாக அழிந்து போவார்கள்.
• களவு அல்ல மற்றைய தேற்றாதவர் = பிறரை ஏமாற்றித் திருடுவதைத் தவிர மற்ற நேர்மையான நல்வழிகளை அறியாதவர்கள்,• அளவு அல்ல செய்து = நீதிக்கு மாறான வரம்பு மீறிய தீய செயல்களைச் செய்து,• ஆங்கே வீவர் = அக்களவுக் குற்றங்களினாலேயே உடனே அழிந்து நாசமாவார்கள்.
மு.வரதராசன்
களவு செய்தலைத் தவிர மற்ற நல்லவழிகளைத் நம்பித் தெளியாதவர் அளவு அல்லாத செயல்களைச் செய்து அப்போதே கெட்டழிவர்.
பரிமேலழகர்
அளவு அல்ல செய்தாங்கே வீவர் - அவ்வளவல்லாத தீய நினைவுகளை நினைத்த பொழுதே கெடுவர், அளவு அல்ல மற்றைய தேற்றாதவர் - களவு அல்லாத பிறவற்றை அறியாதவர். (தீய நினைவுகளாவன : பொருளுடையாரை வஞ்சிக்குமாறும், அவ்வஞ்சனையால் அது கொள்ளுமாறும், கொண்ட அதனால் தாம் புலன்களை நுகருமாறும் முதலாயின. நினைத்தலும் செய்தலாகலின், 'செய்து' என்றும், அஃது உள்ள அறங்களைப் போக்கி, கரந்த சொற் செயல்களைப் புகுவித்து அப்பொழுதே கெடுக்கும் ஆகலின் ஆங்கே வீவர்' என்றும் கூறினார். மற்றையாவன: துறந்தார்க்கு உணவாக ஓதப்பட்ட காய், கனி ,கிழங்கு சருகு முதலாயினவும், இல்வாழ்வார் செய்யும் தானங்களுமாம். தேற்றாமை: அவற்றையே நுகர்ந்து அவ்வளவால் நிறைந்திருத்தலை அறியாமை. இதனாற் கள்வார் கெடுமாறு கூறப்பட்டது.)
சாலமன் பாப்பையா
அடுத்தவர் பொருளைத் திருடுவதைத் தவிர வேறொன்றும் தெரியாதவர் தகுதி அற்ற அந்தச் செயல்களாலேயே அழிந்து போவார்.
Meaning in English
Who have no lore save that which fraudful arts supply, Acts of unmeasured vice committing straightway die