இடுக்கண்கால் கொன்றிட வீழும் அடுத்தூன்றும்நல்லாள் இலாத குடி.
iTukkaNkAl konRiTa vIzhum aTuttUnRumnallAL ilAta kuTi
V. N. Akshadha
பொருள் / உரை
முருகா எளிய உரை
துன்பம் வரும் காலங்களில் முட்டுக் கொடுத்துத் தாங்க வல்ல ஆற்றல்மிக்க பிள்ளைகளோ நல்ல மனிதர்களோ இல்லாத குடும்பமானது, துன்பம் என்னும் கோடாரி அடியில் வெட்டும் போது தாங்க வழியின்றி அடியோடு சாய்ந்து விழும் மரம் போல அழிந்துவிடும்.
• அடுத்தூன்றும் நல்லாள் இலாத குடி = துன்பம் வரும் காலத்தில் முட்டுக் கொடுத்துத் தாங்க வல்ல ஆற்றல்மிக்க நல்ல மனிதர் இல்லாத குடும்பமானது,• இடுக்கண் கால் கொன்றிட = துன்பம் என்னும் கோடாரியானது தன் வேரையே வெட்டிச் சாய்க்கும் போது,• வீழும் = பற்றுக்கோடின்றி அடியோடு சாய்ந்து கீழே விழுந்துவிடும்.
மு.வரதராசன்
துன்பம் வந்த போது உடனிருந்து தாங்க வல்ல நல்ல ஆள் இல்லாத குடி, துன்பமாகிய கோடாரி அடியில் வெட்டி வீழ்த்த விழுந்துவிடும்.
பரிமேலழகர்
இடுக்கண்கால் கொன்றிட வீழும் - துன்பமாகிய நவியம் புகுந்து தன் முதலை வெட்டிச் சாய்க்க ஒரு பற்றின்றி வீழா நிற்கும்; அடுத்து ஊன்றும் நல்லாள் இலாத குடி - அக்காலத்துப் பற்றாவன கொடுத்துத் தாங்க வல்ல நல்ல ஆண்மகன் பிறவாத குடியாகிய மரம். (முதல் - அதன் வழிக்கு உரியர். வளர்ப்பாரைப் பெற்றுழி வளர்ந்து பயன்படுதலும் அல்லாவழிக் கெடுதலும் உடைமையின், மரமாக்கினார், 'தூங்குசிறை வாவலுறை தொல்மரங்கள் அன்ன ஓங்குகுலம் நைய அதனுட் பிறந்த வீரர் தாங்கல் கடன்' (சீவக.காந்தருவ-6) என்றார் பிறரும். இது குறிப்பு உருவகம். இதனான் அவர் இல்லாத குடிக்கு உளதாம் குற்றம் கூறப்பட்டது.)
சாலமன் பாப்பையா
துன்பம் வரும் போது முட்டுக் கொடுத்துத் தாங்கும் நல்ல பிள்ளைகள் இல்லாத வீடும், நாடும் துன்பமாகிய கோடாரி அடிப்பகுதியை வெட்டச் சாயும் மரம் போல் விழுந்து விடும்.
Meaning in English
When trouble the foundation saps the house must fall, If no strong hand be nigh to prop the tottering wall