இழத்தொறூஉம் காதலிக்கும் சூதேபோல் துன்பம்உழத்தொறூஉம் காதற்று உயிர்.
izhattoRUum kAtalikkum sUtEpOl tunpamuzhattoRUum kAtaR Ruyir
Nishanth Maringanti
பொருள் / உரை
முருகா எளிய உரை
சொல் பொருள் (பதவுரை):• இழத்தொறூஉம் காதலிக்கும் சூதேபோல் = பொருளை இழக்க இழக்க ஆசைப்படும் சூதாடி போல்,• துன்பம் உழத்தொறூஉம் = துன்பங்களை அனுபவிக்க அனுபவிக்க,• காதற்று உயிர் = உடலின் மேல் உயிர் ஆசை கொள்கிறது.எளிய விளக்கம்:சூதாட்டத்தில் பொருளை இழக்க இழக்க மேன்மேலும் அதன் மேல் ஆசை வைக்கும் சூதாடியைப் போல, உடலால் துன்பங்களை அனுபவிக்க அனுபவிக்க உயிரானது இந்த உடலின் மீது மேன்மேலும் தீராத பற்றுக் கொள்கிறது.
மு.வரதராசன்
பொருள் வைத்து இழக்க இழக்க மேன்மேலும் விருப்பத்தை வளர்க்கும் சூதாட்டம் போல், உடல் துன்பப்பட்டு வருந்ந வருந்த உயிர் மேன்மேலும் காதல் உடையதாகும்.
பரிமேலழகர்
இழத்தொறூஉம் காதலிக்கும் சூதே போல் - சூதாடலான் இருமைப் பயன்களையும் இழக்குந்தோறும் அதன்மேற் காதல் செய்யும் சூதன் போல; துன்பம் உழத்தொறூஉம் காதற்று உயிர் - உடம்பான் மூவகைத் துன்பங்களையும் அனுபவிக்குந்தோறும் அதன்மேற் காதலை உடைத்து உயிர். (சூது - ஆகுபெயர். உயிரினது அறியாமை கூறுவார் போன்று சூதனது அறியாமை கூறுதல் கருத்தாகலின், அதனை யாப்புறுத்தற் பொருட்டு உவமமாக்கிக் கூறினார். இதன் எதிர்மறை முகத்தால், சூதினை வெறுத்து ஒழிவானை யொக்கும் உடம்பினை வெறுத்தொழியும் உயிர் எனவும் கொள்க, இதனான் இஃது ஒழிதற்கு அருமையும், ஒழிந்தாரது பெருமையும் கூறப்பட்டன.)
சாலமன் பாப்பையா
துன்பத்தை அனுபவிக்கும் போதெல்லாம் இந்த உடம்பின் மேல் உயிருக்குக் காதல் பெருகுவது போல, சூதாடிப் பொருளை இழந்து துன்பப்படும் போதெல்லாம் சூதாட்டத்தின் மேல் ஆசை பெருகும்.
Meaning in English
Howe'er he lose, the gambler's heart is ever in the play; E'en so the soul, despite its griefs, would live on earth alway