துறந்தார் படிவத்த ராகி இறந்தாராய்ந்துஎன்செயினும் சோர்விலது ஒற்று.
tuRantAr paTivatta rAki iRantArAyntenseyinunj sOrvila toRRu
Radhika Bhamidipati
பொருள் / உரை
முருகா எளிய உரை
சொல் பொருள் (பதவுரை):• துறந்தார் படிவத்தர் ஆகி = துறவிகள் போன்ற வேடத்தைப் பூண்டு,• இறந்தாராய்ந்து = யாரும் நுழைய முடியாத இடங்களிலும் புகுந்து ஆராய்ந்து,• என்செயினும் = எதிரிகள் எத்தகைய துன்பங்களைச் செய்த போதிலும்,• சோர்விலது ஒற்று = மனம் தளராமல் ரகசியத்தைக் காப்பவனே சிறந்த ஒற்றன் ஆவான்.எளிய விளக்கம்:துறவிகள் வேடம் பூண்டு நுழைய முடியாத கடினமான இடங்களிலும் நுழைந்து உண்மை நிகழ்வுகளை ஆராய்ந்து, பிடிபட்டாலும் பகைவர்கள் செய்யும் எந்தத் துன்பத்திற்கும் மனம் தளராமல் இரகசியத்தைக் காப்பவனே சிறந்த ஒற்றன் ஆவான்.
மு.வரதராசன்
துறந்தவரின் வடிவத்தை உடையவராய், அறிய இடங்களிலெல்லாம் சென்று ஆராய்ந்து (ஐயுற்றவர்) என்ன செய்தாலும் சோர்ந்து விடாதவரே ஒற்றர் ஆவர்.
பரிமேலழகர்
துறந்தார் படிவத்தர் ஆகி இறந்து ஆராய்ந்து - முற்றும் துறந்தாராயும் விரதஒழுக்கினராயும் உள்புகுதற்கு அரிய இடங்களெல்லாம் உள்புக்கு ஆராயவேண்டுவன ஆராய்ந்தறிந்து; என் செயினும் சோர்வு இலது ஒற்று - ஆண்டையார் ஐயுற்றுப் பிடித்து எல்லாத்துன்பமும் செய்து கேட்டாலும் தன்னை வெளிப்படுத்தாதவனே ஒற்றனாவான். (விரத ஒழுக்கம் - தீர்த்த யாத்திரை முதலாயின. செயினும் என்பது அறவோர் என்று செய்வாரின்மை விளக்கி நின்றது. மேல் நால்வகை உபாயத்தினும் சோர்வின்மை சொல்லி வைத்தும், ஈண்டும் தண்டத்தைப் பிரித்துக்கூறியது, அதனது பொறுத்தற்கு அருமைச் சிறப்பு நோக்கி. இதனுள் 'படிவம்' என்றதனை வேடமாக்கி, 'துறந்தார் வேடத்தாராகி' என்று உரைப்பாரும் உளர்.)
சாலமன் பாப்பையா
செல்ல முடியாத இடங்களுக்கும் கூடத் துறவியர் வேடத்தில் சென்று, அறிய வேண்டுவற்றை அறிந்து, அங்கே பிடிபட்டால், பிடித்தவர் எத்தகைய துன்பம் செய்தாலும் ரகசியத்தைச் சொல்லாதவரே ஒற்றர்.
Meaning in English
As monk or devotee, through every hindrance making way, A spy, whate'er men do, must watchful mind display