சினத்தைப் பொருளென்று கொண்டவன் கேடுநிலத்தறைந்தான் கைபிழையா தற்று.
sinattaip poruLenRu koNTavan kETunilattaRaintAn kaipizhaiyA taRRu
Srinisha Jayaseelan
பொருள் / உரை
முருகா எளிய உரை
கடினமான தரையைக் கையால் ஓங்கி அடித்தவன் கை வலி தாங்காமல் காயப்படுவதைப் போல, சினத்தைத் தன் பெருமைக்குரிய குணமாகக் கருதி வாழ்பவன் தவறாமல் அழிவையும் கடுமையான வேதனையையும் அடைவான்.
• சினத்தை = கோபப்படுவதை• பொருள் என்று கொண்டவன் = தன் வீரத்தைக் காட்டும் ஒரு தகுதியான குணமாகக் கொண்டு வாழ்பவனின்• கேடு = அழிவு மற்றும் வேதனையானது,• நிலத்து அறைந்தான் = கடினமான தரையின் மீது தன் கையால் ஓங்கி அடித்தவனுடைய• கை பிழையாதற்று = கையானது வலியாலும் காயத்தாலும் தப்பாமல் வேதனைப்படுவதைப் போலத் தவறாமல் வந்து சேரும்.
மு.வரதராசன்
(தன் வல்லமை புலப்படுத்தச்) சினத்தை பொருளென்று கொண்டவன் அழிதல், நிலத்தை அறைந்தவனுடைய கை தப்பாதது போல் ஆகும்.
பரிமேலழகர்
சினத்தைப் பொருள் என்று கொண்டவன் கேடு - சினத்தைத் தன் ஆற்றல் உணர்த்துவதோர் குணம் என்று தன்கண் கொண்டவன் அவ்வாற்றல் இழத்தல்; நிலத்து அறைந்தான் கை பிழையா தற்று - நிலத்தின்கண் அறைந்த அவன் கை அந்நிலத்தையுறுத்தல் தப்பாதவாறு போலத் தப்பாது. (வைசேடிகர் பொருள், பண்பு, தொழில், சாதி, விசேடம், இயைபு என்பவற்றை 'அறுவகைப் பொருள்' என்றாற்போல, ஈண்டுக்குணம் 'பொருள்' எனப்பட்டது. 'பிழையாததற்று' என்பது குறைந்து நின்றது. இவை மூன்று பாட்டானும் வெகுண்டார்க்கு வரும் தீங்கு கூறப்பட்டது.)
சாலமன் பாப்பையா
நிலத்தில் அடித்தவன் கை, வேதனையில் இருந்து தப்ப முடியாதது போலக், கோபத்தைக் குணமாகக் கொண்டவனும் வேதனை அனுபவத்திலிருந்து தப்ப முடியாது.
Meaning in English
The hand that smites the earth unfailing feels the sting; So perish they who nurse their wrath as noble thing