ஒருநாள் எழுநாள்போல் செல்லும்சேண் சென்றார்வருநாள்வைத்து ஏங்கு பவர்க்கு.
orunAL ezhunALpOl sellumsEN senRArvarunALvait tEngku pavarkku
Charulatha Mani
பொருள் / உரை
முருகா எளிய உரை
நெடுந்தொலைவு பிரிந்து சென்ற காதலர் திரும்பி வரும் நாளை எண்ணி எதிர்பார்த்து ஏங்கும் பெண்களுக்கு, ஒரு நாள் கழிவதும் கூட ஏழு நாட்கள் போல மிக நீண்டதாகத் தோன்றும்!
• சேண் சென்றார் = நெடுந்தொலைவு பிரிந்து சென்ற காதலர்,• வருநாள் வைத்து ஏங்குபவர்க்கு = திரும்பி வரும் நாளை எண்ணி எதிர்பார்த்து ஏங்கும் பெண்களுக்கு;• ஒரு நாள் = ஒரு நாள் கழிவதும் கூட,• எழு நாள் போல் செல்லும் = ஏழு நாட்கள் போல (நெடிய யுகம் போல) மிக மெதுவாகக் கழியும்!
மு.வரதராசன்
தொலைவில் உள்ள வெளிநாட்டிற்குச் சென்ற காதலர் திரும்பி வரும் நாளை நினைத்து ஏங்கும் மகளிர்க்கு ஒருநாள் ஏழுநாள் போல ( நெடிதாக) கழியும்.
பரிமேலழகர்
(இதுவும் அது.) சேண் சென்றார் வருநாள் வைத்து ஏங்குபவர்க்கு - சேணிடைச் சென்ற தம் காதலர் மீண்டுவரக் குறித்தநாளை உட்கொண்டு, அது வரும் துணையும் உயிர்தாங்கி வருந்தும் மகளிர்க்கு; ஒரு நாள் எழுநாள் போல் செல்லும் - ஒரு நாள் பல நாள் போல நெடியதாகக் காட்டும். ('ஏழ்' என்பது அதற்குமேலாய மிக்க பன்மை குறித்து நின்றது; 'ஒருவர் கூறை எழுவர் உடுத்து' என்றாற்போல. தலைமகள் வருத்தம் பிறர்மேலிட்டுக் கூறியவாறு. இதனான் இதுவும் தலைமகள் கூற்றாகாமையறிக. 'இரு நாள்' என்று பாடம் ஓதுவாரும் உளர்.)
சாலமன் பாப்பையா
தொலைதூரம் சென்று தன் கணவன் வரும் நாளை எண்ணி வருந்தும் பெண்களுக்கு ஒருநாள் பலநாள் போல நெடிதாகத் தோன்றும்.
Meaning in English
One day will seem like seven to those who watch and yearn For that glad day when wanderers from afar return