திருப்புகழ் · 714சுருதி மறைகள் (உத்தரமேரூர்)surudhimaRaigaL
தனன தனன தனதான தனன தனன தனதான
தனன தனன தனதான ...... தனதான
தினம் ஒரு திருப்புகழ் Dinam oru Thiruppugazh
சுருதி மறைக ளிருநாலு திசையி லதிபர் முநிவோர்கள்
துகளி லிருடி யெழுபேர்கள் ...... சுடர்மூவர்
சொலவில் முடிவில் முகியாத பகுதி புருடர் நவநாதர்
தொலைவி லுடுவி னுலகோர்கள் ...... மறையோர்கள்
அரிய சமய மொருகோடி அமரர் சரணர் சதகோடி
அரியு மயனு மொருகோடி ...... யிவர்கூடி
அறிய அறிய அறியாத அடிக ளறிய அடியேனும்
அறிவு ளறியு மறிவூற ...... அருள்வாயே
வரைகள் தவிடு பொடியாக நிருதர் பதியு மழிவாக
மகர சலதி அளறாக ...... முதுசூரும்
மடிய அலகை நடமாட விஜய வனிதை மகிழ்வாக
மவுலி சிதறி இரைதேடி ...... வருநாய்கள்
நரிகள் கொடிகள் பசியாற உதிர நதிக ளலைமோத
நமனும் வெருவி யடிபேண ...... மயிலேறி
நளின வுபய கரவேலை முடுகு முருக வடமேரு
நகரி யுறையு மிமையோர்கள் ...... பெருமாளே.
பத உரைword meanings
- சுருதி மறைகள்
வேதங்கள், உபநிஷதம் முதலிய ஆகமங்கள், - இருநாலு திசையில் அதிபர் முநிவோர்கள்
எட்டுத் திக்குப் பாலகர்கள்* 1 , முநிவர்கள் - துகளில் இருடி யெழுபேர்கள் சுடர்மூவர்
குற்றமில்லாத ரிஷிகள் ஏழு பேர்* 2 , சூரியன், சந்திரன், அக்கினி எனப்படும் மூன்று சுடர்கள், - சொலவில் முடிவில் முகியாத பகுதி புருடர் நவநாதர்
சொல்லுவதற்கு முடிவிலே முடியாத பிரகிருதி புருஷர்களான பிரபஞ்ச மாயா அதிகாரிகள், பிரதானசித்தர்களான ஒன்பது நாதர்கள்* 3 , - தொலைவில் உடுவின் உலகோர்கள் மறையோர்கள்
வெகு தூரத்தில் உள்ள நக்ஷத்திர உலகில் வாழ்பவர்கள், வேதம் வல்லவர்கள், - அரிய சமய மொருகோடி அமரர் சரணர் சதகோடி
அருமையான சமயங்கள் கோடிக்கணக்கானவை, தேவர்கள், நூற்றுக் கோடிக்கணக்கான அடியார்கள், - அரியும் அயனும் ஒருகோடி யிவர்கூடி
திருமால், பிரமன், ஒரு கோடி பேர் - இவர்களெல்லாம் கூடி, - அறிய அறிய அறியாத அடிகள் அறிய
அறிந்து கொள்ள, அறிந்து கொள்ள (எத்தனை முயன்றும்) அறிய முடியாத உனது திருவடிகளை, - அடியேனும் அறிவுள் அறியும் அறிவூற அருள்வாயே
அடியேனும் எனது அறிவுக்கு உள்ளேயே அறிந்து கொள்ள வல்லதான அறிவு ஊறும்படி நீ அருள்புரிவாயாக. - வரைகள் தவிடு பொடியாக நிருதர் பதியும் அழிவாக
கிரெளஞ்சம் முதலிய மலைகள் தவிடு பொடியாக, அசுரர்களின் ஊர்கள் அழிவடைய, - மகர சலதி அளறாக முதுசூரும் மடிய
மகர மீன்கள் உள்ள கடல் சேறாக, பழைய சூரனும் அழிவுற, - அலகை நடமாட விஜய வனிதை மகிழ்வாக
பேய்கள் நடனம் செய்ய, விஜய லக்ஷ்மி மகிழ்ச்சி அடைய, - மவுலி சிதறி இரைதேடி வருநாய்கள்
அசுரர்களின் தலைகள் சிதறிவிழ, இரையைத் தேடிவந்த நாய்களுடன், - நரிகள் கொடிகள் பசியாற உதிர நதிகள் அலைமோத
நரிகளும், காக்கைகளும், பசி நீங்க, ரத்த வெள்ளம் அலைமோதி ஓட, - நமனும் வெருவி யடிபேண
யமனும் அச்சமுற்று உனது திருவடிகளைத் துதிக்க, - மயிலேறி நளின வுபய கரவேலை முடுகு முருக
மயிலில் ஏறி, மகிமைவாய்ந்த திருக்கரத்து வேலாயுதத்தை விரைவாகச் செலுத்தும் முருகனே, - வடமேரு நகரி யுறையும் இமையோர்கள் பெருமாளே.
உத்தரமேரூர்* 4 என்ற தலத்தில் வீற்றிருப்போனே, தேவர்களின் பெருமாளே.
குறிப்புகள் · notes
- (*1) அஷ்டதிக்குப் பாலகர்கள் (எண்திசையைக் காப்பவர்கள்) பின்வருமாறு: இந்திரன், அக்கினி, யமன், நிருதி, வருணன், வாயு, குபேரன், ஈசானன்.
- (*2) சப்தரிஷிகள் பின்வருமாறு: அகஸ்தியர், புலஸ்தியர், ஆங்கீரசர், கெளதமர், வசிஷ்டர், காச்யபர், மார்க்கண்டர்.
- (*3) நவநாதராகிய பெருஞ் சித்தர் பின்வருமாறு: சத்தியநாதர், சதோகநாதர், ஆதிநாதர், அனாதிநாதர், வகுளநாதர், மதங்கநாதர், மச்சேந்திரநாதர், கடேந்திரநாதர், கோரக்கநாதர். இவர்கள் குகைகளில் இருந்து சிவனைக் குறித்துத் தவம் செய்து சித்தராயினர்.
- (*4) உத்தரமேரூர் செங்கற்பட்டு ரயில் நிலையத்திலிருந்து தென்மேற்கே 18 மைலில் உள்ளது.
- *1 AshtadhikpAlakAs - protectors of the eight cardinal directions - are: IndrA, Agni, Yama, Nruthi, VaruNa, VAyu, KubEra and EesAna.
- *2 The seven Rishis are: Agasthya, Pulasthya, Aangeeras, Gouthama, Vasishta, Kasyapa and MArkkaNda.
- *3 The nine senior SidhdhAs (achievers - NavanAthars) - were as follows: SathyanAthar, SathokanAthar, AadhinAthar, AnAdhinAthar, VaghuLanAthar, MadhanganAthar, MachchendranAthar, GadendranAthar and GorakkanAthar. They did penance in the caves praying to Lord SivA and attained the status of Sidhdha.
- *4 UththaramErUr is 18 miles southwest of Chengalpatttu railway station.