திருப்புகழ் · 629நாமேவு குயிலாலும் (குன்றக்குடி)nAmEvukuyilAlum
தானான தனதான தானான தனதான
தானான தனதான ...... தனதான
Yaazh Music
நாமேவு குயிலாலு மாமார னயிலாலு
நாடோறு மதிகாயும் ...... வெயிலாலும்
நார்மாதர் வசையாலும் வேயூது மிசையாலு
நாடாசை தருமோக ...... வலையூடே
ஏமாறி முழுநாளு மாலாகி விருதாவி
லேவாரும் விழிமாதர் ...... துயரூடே
ஏகாம லழியாத மேலான பதமீதி
லேகீயு னுடன்மேவ ...... அருள்தாராய்
தாமோக முடனூறு பால்தேடி யுரலூடு
தானேறி விளையாடு ...... மொருபோதில்
தாயாக வருசோதை காணாது களவாடு
தாமோத ரன்முராரி ...... மருகோனே
மாமாது வனமாது கார்மேவு சிலைமாது
மாலாகி விளையாடு ...... புயவீரா
வானாடு புகழ்நாடு தேனாறு புடைசூழ
மாயூர கிரிமேவு ...... பெருமாளே.
பத உரைword meanings
- நா மேவு குயிலாலும் மா மாரன் அயிலாலு(ம்)
நாவால் கூவி இசைக்கும் குயிலின் பாட்டாலும், சிறந்த மன்மதனுடைய கூரிய பாணங்களாலும், - நாள் தோறும் மதி காயும் வெயிலாலும்
நாள் தோறும் வெய்யில் போல் காய்கின்ற நிலவின் ஒளியாலும், - நார் மாதர் வசையாலும் வேய் ஊதும் இசையாலும்
அன்பும் அக்கரையும் உள்ள மாதர்கள் பேசும் வசை மொழியாலும், புல்லாங்குழல் ஊதும் இசையாலும், - நாடு ஆசை தரு மோக வலை ஊடே
விரும்புகிற ஆசையால் வரும் மோகம் என்கின்ற வலைக்குள், - ஏமாறி முழு நாளும் மாலாகி விருதாவிலே
ஏமாற்றம் அடைந்து நாள் முழுதும் காம இச்சையால் வீணாகவே - வாரும் விழி மாதர் துயர் ஊடே ஏகாமல்
நீண்ட கண்களை உடைய மாதர்களால் ஏற்படும் ஏச்சுத் துயரத்துக்குள் வீழாமல், - அழியாத மேலான பதம் மீதில் ஏகீ உ(ன்)னுடன் மேவ
அருள்தாராய்
அழிவில்லாததும், மேலானதுமான நிலையை அடைந்து உன்னுடன் நான் பொருந்தி இருக்க அருள் புரிவாயாக. - தாம் மோகமுடன் ஊறு பால் தேடி உரலோடு தான் ஏறி
விளையாடும் ஒரு போதில்
தாம் ஆசையுடன் கறந்த பாலைத் தேடி உரலுடன் ஏறி விளையாடும் ஒரு பொழுதில், - தாயாக வரு (ய)சோதை காணாது களவாடு தாமோதரன்
முராரி மருகோனே
தாயாக (அங்கு) வந்த யசோதை (அந்தப்) பாலைக் காண முடியாதபடி திருடிய தாமோதரன்* (ஆகிய) திருமாலின் மருகனே, - மா மாது வன மாது கார் மேவும் சிலை மாது
சிறந்த லக்ஷ்மி போன்ற மாது, காட்டில் வளர்ந்த மாது, மேகம் தவழும் (வள்ளி) மலையில் வாழ்ந்த மாது ஆகிய வள்ளி - மாலாகி விளையாடும் புய வீரா
ஆசை பூண்டு விளையாடுகின்ற புயங்களை உடைய வீரனே, - வான் நாடு புகழ் நாடு தேன் ஆறு புடை சூழும்
விண்ணோர்களும் புகழும் நாட்டில் தேனாறு பக்கத்தில் சூழ்ந்து வரும் - மாயூர கிரி மேவும் பெருமாளே.
மாயூர கிரி எனப்படும் குன்றக் குடியில்** வீற்றிருக்கும் பெருமாளே.
குறிப்புகள் · notes
- * தாமம் = கயிறு, உதரம் = வயிறு, கயிற்றினால் வயிற்றில் கட்டப்பட்டதால் தாமோதரன் ஆயினான்.
- ** குன்றக்குடி ராமநாதபுரம் மாவட்டத்தில் காரைக்குடிக்கு மேற்கே 7 மைலில் உள்ளது.
- இப்பாடல் அகத்துறையில் 'நாயக நாயகி' பாவத்தில் புலவர் தம்மையே நாயகியாக எண்ணிப் பாடியது. குயிலின் இசை, நிலவு, மன்மதன், அவனது அம்புகள், வசை பேசும் மாதர், புல்லாங்குழலின் இசை முதலியவை தலைவனின் பிரிவை மிகவும் அதிகமாக்கும் பொருட்கள்.
- * DhAmam = rope, utharam = belly; as KrishnA was tied with a rope by YasOdha around his belly, He was known as DhAmOtharan.
- ** KundRakkudi is in RAmanAthapuram District, 7 miles west of KAraikkudi.
- This song is based on the Nayaka-Nayaki Bhavam, where the poet, assuming the heroine's role, expresses the pang of separation from the hero, Murugan. The cuckoo's song, the moonlight, the God of Love Manmathan, His arrows, scandal-mongering women and the music from the flute are a few of the things that aggravate the agony of separation.