திருப்புகழ் · 523ஒருபதும் இருபதும் (ஸ்ரீ சைலம் திருமலை)orubadhumirubadhum
தனதன தனதன தனதன தனதன
தனதன தனதன ...... தனதான
Thiruppugazh Anbargal
ஒருபது மிருபது மறுபது முடனறு
முணர்வுற இருபத ...... முளநாடி
உருகிட முழுமதி தழலென வொளிதிகழ்
வெளியொடு வொளிபெற ...... விரவாதே
தெருவினில் மரமென எவரொடு முரைசெய்து
திரிதொழி லவமது ...... புரியாதே
திருமகள் மருவிய திரள்புய அறுமுக
தெரிசனை பெறஅருள் ...... புரிவாயே
பரிவுட னழகிய பழமொடு கடலைகள்
பயறொடு சிலவகை ...... பணியாரம்
பருகிடு பெருவயி றுடையவர் பழமொழி
எழுதிய கணபதி ...... யிளையோனே
பெருமலை யுருவிட அடியவ ருருகிட
பிணிகெட அருள்தரு ...... குமரேசா
பிடியொடு களிறுகள் நடையிட கலைதிரள்
பிணையமர் திருமலை ...... பெருமாளே.
பத உரைword meanings
- ஒருபதும் இருபதும் அறுபதும் உடன்அறும்
ஒரு பத்து, இருபது, அறுபது, ஆறு (10+20+60+6) ஆக தொண்ணூற்றாறு தத்துவங்களின்* - உணர்வுற
உண்மையை உணர்ந்து, - இருபதம் உளநாடி
உன் இரண்டு திருவடிகளையும் உள்ளத்தில் தியானித்து - உருகிட
அதனால் உள்ளம் உருகிட, - முழுமதி தழலென ஒளிதிகழ்
பூரண சந்திரனது தீப்போன்று ஒளி வீசும் - வெளியொடு ஒளிபெற விரவாதே
பரவெளியின் ஒளியை யான் பெற்று அதோடு கலவாமல், - தெருவினில் மரமென
வீதியிலே மரம் போல நின்று - எவரொடும் உரைசெய்து திரிதொழில்
யாரோடும் பேசித் திரியும் தொழிலை - அவமது புரியாதே
யான் மேற்கொண்டு வீணாக அலையாது இருப்பதற்காக, - திருமகள் மருவிய
லக்ஷ்மியின் மகள் வள்ளி தழுவிய - திரள்புய அறுமுக
திரண்ட தோள்களை உடையவனே, ஆறுமுகனே, - தெரிசனை பெறஅருள் புரிவாயே
உன் அருட்காட்சி பெற எனக்கு அருள் புரிவாயாக. - பரிவுட னழகிய பழமொடு
அன்போடு நிவேதனம் செய்யப்பட்ட நல்ல பழங்களுடன், - கடலைகள் பயறொடு சிலவகை பணியாரம்
கடலை வகைகள், பயறு, சில பணியாரங்களை - பருகிடு பெருவயி றுடையவர்
உண்ணும் பெரு வயிற்றை உடையவரும், - பழமொழி எழுதிய
பழமையான மொழியாகிய மஹாபாரதத்தை மேருமலையில் எழுதியவருமான - கணபதி யிளையோனே
கணபதிக்குத் தம்பியே, - பெருமலை யுருவிட
பெரிய கிரெளஞ்சமலையை ஊடுருவவும், - அடியவர் உருகிட
உன் அடியவர்கள் உள்ளம் உருகிடவும், - பிணிகெட
அடியார்களின் பிறவிநோய் தொலையவும் - அருள்தரு குமரேசா
திருவருள் புரிகின்ற குமாரக் கடவுளே, - பிடியொடு களிறுகள் நடையிட
பெண்யானைகளோடு ஆண்யானைகள் உலாவும், - கலைதிரள் பிணையமர்
கலைமான்களின் கூட்டம் பெண்மான்களோடு விரும்பி அமரும் - திருமலை பெருமாளே.
திருமலையாகிய ஸ்ரீசைலத்தில்** உள்ள பெருமாளே.
குறிப்புகள் · notes
- * 96 தத்துவங்கள் பின்வருமாறு: 36 பரதத்துவங்கள் (அகநிலை): ஆத்ம தத்துவம் 24, வித்யா தத்துவம் 7, சிவ தத்துவம் 5. ஐம்பூதங்கள், அவற்றின் தன்மைகளோடு, ஐயைந்து - 25 (புறநிலை): மண், தீ, நீர், காற்று, வெளி. ஏனைய தத்துவங்கள் 35 (புறநிலை): வாயுக்கள் 10, நாடிகள் 10, கன்மங்கள் 5, அகங்காரம் 3, குணம் 3, வாக்குகள் 4.
- ** ஸ்ரீசைலம் ஆந்திர மாநிலத்தில் உள்ளது. பன்னிரு ஜோதிர்லிங்கங்களில் இங்குள்ள மல்லிகார்ச்சுனரும் ஒருவர். தமிழில் இவ்வூர் திருமலை, திருப்பருப்பதம் எனப்படும்.
- * The 96 thathvAs (tenets) are as follows: 36 ParathathvAs (internal, Superior Tenets): 'AathmA' (soul) thathvAs 24, 'vidhyA' (knowledge) thathvAs 7, 'siva' thathvAs 5. 5 Elements (external, with five aspects each making 25): Earth, Fire, Water, Air, Cosmos. 35 Other thathvAs (external): 'vAyus' (gases) 10, nAdis (kundalinis) 10, karmAs 5, ahangkAram (ego) 3, gunAs (character) 3, vAkku (speech).
- ** VinAyagA was supposed to have written down MahAbhArathA with His one broken tusk while VyAsA narrated the story at MahA KailAs according to VinAyaga PurANam.
- *** Srichailam is in Andhra Pradesh with main deity Mallikarjuna, one of the twelve JyothirlingAs of SivA. In Tamil, Srichailam is called Thirumalai and Thirupparuppatham.